Ferrol, 19 de decembro de 2023

A delegada territorial da Xunta en Ferrol, Martina Aneiros, visitou esta mañá a tenda Ferrol Sport, un dos establecementos da cidade adheridos ata o momento ao novo Bono Deporte da Xunta que sufragará con 120 euros as compras de material e equipamento deportivo, ademais da asistencia a clases ou a realización de actividades deportivas para nenos de entre 6 e 16 anos.

Segundo explicou Aneiros, o obxectivo desta nova medida da Secretaría Xeral para o Deporte é a de “fomentar a práctica da actividade física e o deporte base, ao mesmo tempo que se impulsa o comercio galego e se apoia ás familias nun contexto de alza de prezos”, resaltou.

O Bono Deporte permitirá ás familias con fillos federados ou inscritos no programa Xogade sufragar o 80% do gasto nas compras de material de equipamento ou o custo da asistencia a clases de actividades deportivas, que se irá descontando ata esgotar os 120 euros do bono.

Cada familia poderá descargar un Bono Deporte por cada fillo a partir do 8 de xaneiro e ata o 29 de febreiro, salvo que se esgote antes o crédito do programa, a través da web bonodeporte.gal. Unha vez descargado poderá empregarse ata o 1 de xullo.

A delegada territorial animou aos negocios da cidade a adherirse a esta iniciativa que conta cun orzamento da Vicepresidencia primeira e Consellería de Presidencia, Xustiza e Deporte de 16,2 M€. O trámite poderán efectualo tamén a través da web do programa ata o 2 de xaneiro. A delegada lembrou que esta iniciativa segue experiencias similares ao Bono Turístico ou o Bono Comercio, “que teñen colleitado un gran éxito nas súas convocatorias”.