O director da Casa de Galicia en Madrid, Javier Vázquez, participou na conferencia que impartiu Antonio Troncoso: "Antonio Palacios Ramilo, arquitecto. Descrición persoal, o que puido ser e non foi".

Acompañaron ao conferenciante: Horacio Rico Rodríguez, presidente de FAGAMA; e Fernando Gómez, presidente da Xuntanza de Alcobendas.

Antonio Troncoso é licenciado en Dereito pola Universidade de Santiago de Compostela. Foi relator e profesor en diversos simposios e publicou numerosas obras e artigos sobre Dereito. Foi profesor de Xeografía Turística.

O conferenciante centrouse fundamentalmente en dar a coñecer a visión persoal e humana, dun galego considerado un dos arquitectos máis importantes e influentes en España durante a primeira metade do século XX. Antonio Palacios foi o responsable dalgúns dos edificios máis emblemáticos de Madrid que contribuíron a transformar a antiga vila barroca nunha metrópole moderna.

Entre os edificios máis importantes e significativos da súa dilatada traxectoria profesional, destacan o Palacio de Comunicacións, o Hospital de Jornaleros de San Francisco de Paula ou o Círculo de Belas Artes. Trátase de construcións que poden catalogarse como singulares, posto que responden a tipoloxías edilicias que non tiveron continuidade na súa obra, pero tamén porque son as que mellor resumen as características da súa arquitectura.

Ademais, todos estes edificios teñen en común a súa excepcional localización, xa sexa en grandes prazas como Cibeles e Cánovas del Castillo, en rúas de importancia histórica e artística como Mayor, Alcalá e Gran Vía, ou nun contexto illado que favorece a súa contemplación como é o caso do Hospital de Jornaleros na rúa Maudes.