A directora xeral de Saúde Pública da Consellería de Sanidade, Carmen Durán Parrondo, recolleu onte pola tarde, na sede da Embaixada Italiana en Madrid, un recoñecemento honorífico ao Programa de Cribado Neonatal da Xunta de Galicia, na categoría de liderado en políticas sanitarias, outorgado no marco da II Edición dos Premios Imparables Sanitarios. O acto contou coa presenza do embaixador italiano en España, Giusseppe María Buccino Grimaldi.

A directora xeral, quen estivo acompañada na recollida do premio polo xefe de sección do Laboratorio de Metabolopatías do Hospital Clínico de Santiago, José Ángel Cocho de Juan, agradeceu este galardón que distingue o compromiso e apoio aos referentes sanitarios polo seu excepcional desempeño profesional no ámbito da saúde e coidado dos pacientes.

Cómpre remarcar que o Goberno galego aprobou, a finais do pasado mes de novembro, o Decreto polo que se regula o Programa galego para a detección precoz de enfermidades xenéticas, endócrinas e metabólicas en período neonatal, que ascenden a un total de 34, e polo que se crea o comité asesor do programa.

Desta forma, Galicia mantén a máis ampla carteira de cribado neonatal de todo o Sistema Nacional de Saúde, que unicamente marca sete enfermidades na carteira básica.      Con ela, desde o ano 2000 e ao peche de decembro de 2022, participaron nos cribados 449.109 neonatos, que representan unha taxa do 99 %, e foron diagnosticadas 647 enfermidades (212 hipotiroidismo conxénito, 40 fenilcetonurias, 52 fibrose císticas e 343 metabólicas).

Como ampliación da carteira de servizos galega, no mes de maio deste ano, incorporouse a detección precoz de Atrofia Medular Espinal (AME), Inmunodeficiencia Combinada Grave (IDCG) e Hiperplasia Suprarrenal Conxénita (HSC). Desde ese momento, dous bebés foron diagnosticados de AME e comezaron o tratamento, o que pode supoñer un gran avance para a súa calidade de vida.

Para valorar o funcionamento deste programa de cribado e as posibles modificacións que se consideren oportunas en base á evidencia científica, o Goberno galego tamén aprobou no mes de novembro a creación dun comité asesor.

Publicación do Decreto

Ao respecto deste cribado, compre remarcar que o Diario Oficial de Galicia publica, na súa edición de hoxe, o Decreto 148/2023, do 23 de novembro, polo que se regula o Programa galego para a detección precoz de enfermidades xenéticas, endócrinas e metabólicas en período neonatal e se crea o Comité asesor do programa.

Este decreto é de aplicación no ámbito da Comunidade Autónoma de Galicia, incluíndo todos os centros sanitarios que dispoñan de atención materno-infantil ou unidades de maternidade, tanto de titularidade pública como privada ou outro lugar eventual de nacemento.

Garantirase a posibilidade de realizar as probas de cribado neonatal para a detección precoz das enfermidades conxénitas a todas as persoas neonatas vivas da Comunidade de Galicia, independentemente da titularidade pública ou privada da maternidade onde se produza o nacemento, logo de autorización dos seus proxenitores ou representantes legais e, sempre que non exista algún impedimento debidamente xustificado, de forma previa á alta hospitalaria da maternidade.