Vilanova de Arousa (Pontevedra), 22 de novembro de 2023

O delegado territorial da Xunta en Pontevedra, Agustín Reguera, visitou esta mañá o Mercado de Vilanova de Arousa, onde a administración autonómica investirá máis de 25.000 euros como parte das axudas para o impulso dunha rede de mercados excelentes de Galicia e a dinamización e rehabilitación das prazas de Abastos.

Esta axuda fai parte dos máis de 336.000 euros que se investiron na área territorial de Pontevedra e que están a permitir mellorar o funcionamento e as infraestruturas de preto de 15 mercados. Na comarca do Salnés o seu importe é de preto de 120.000 euros.

Así, por un lado a Xunta achegará 14.500 euros ao Concello que serán investidos na elaboración dun estudo de mercado e en iniciativas de mentoring e formación para os traballadores. Por outro lado, a Asociación de Profesionais Umbrío da Praza de Abastos de Vilanova recibirá unha achega de máis de 11.000 euros.

O delegado territorial aproveitou a súa visita para lembrar a importancia de modernizar os servizos prestados neste tipo espazos para atraer ao novo público e consolidar aos clientes habituais: “A Xunta de Galicia está comprometida co comercio de proximidade e está claro que os praceiros e praceiras ofrecen un servizo de gran calidade que temos que preservar”.

Neste sentido asegurou que as axudas da Xunta para a rede de Mercados Excelentes de Galicia supoñen “un impulso para que, tanto os concellos como os profesionais dos mercados e prazas de abastos poidan mellorar as súas infraestruturas e tamén, como neste caso, para que os propios traballadores poidan formarse e crecer profesionalmente”.