A XI andaina contra a violencia de xénero Camiño ao respecto porá o broche o próximo domingo 26 de novembro aos actos convocados pola Xunta de Galicia con motivo da conmemoración este sábado do Día internacional da eliminación da violencia contra a muller.

O Goberno galego convida á sociedade a participar no percorrido que sairá ás 11,00 horas do Monte do Gozo en dirección á Praza do Obradoiro en Santiago de Compostela. As persoas interesadas en tomar parte na andaina de xeito individual ou en grupo poden formalizar a súa inscrición na web https://andaina.caminoaorespecto.gal para recibir un dorsal personalizado no enderezo electrónico que aporten.

Un ano máis bríndase á sociedade galega a sumarse tamén á andaina de xeito virtual. Esta modalidade, instaurada en tempos de pandemia, mantense unha convocatoria máis para abrir o evento a galegas e galegos de todos os puntos da xeografía. Convídase ás persoas ou colectivos a que realicen os seus propios percorridos entre o 26 de novembro e o 3 de decembro e a que compartan os quilómetros camiñados e fotografías da saída e o dorsal a través das redes sociais co hashtag #CAMIÑOAORESPECTO ou por correo electrónico (contacto@caminoaorespecto.gal) ou Whatsapp (teléfono: 669 962 249).

Ata o momento, a Consellería de Promoción do Emprego e Igualdade xa contabiliza case 5.000 persoas inscritas en ambas as dúas modalidades, presencial (650) e virtual (4.200).

A andaina será o colofón a unha semana de actos cos que a Xunta de Galicia está a reafirmar o seu compromiso contra a violencia de xénero. O sábado, 25 de novembro, coincidindo coa data simbólica de loita contra esta lacra, celebrarase un acto institucional no Castelo de Soutomaior, en Pontevedra. No mesmo darase protagonismo a representantes do ámbito educativo, sanitario, da comunicación, dos centros de información á muller e das forzas de seguridade que amosarán as súas reflexións para avanzar na prevención e na sensibilización sobre a violencia en contra das mulleres.

Este mesmo martes, e con encaixe na semana do 25-N, o Parlamento de Galicia aprobou a nova Lei de igualdade efectiva de mulleres e homes, que sitúa a Galicia á vangarda na loita contra calquera discriminación contra a muller. O texto definitivo incorporou máis de 200 alegacións realizadas por 52 entidades representativas, así como polos grupos parlamentarios. Este marco inclúe medidas concretas contra as discriminacións múltiples das mulleres con discapacidade; promove a creación de espazos urbanos seguros, libres de violencia sexual e de acoso, e dedica un capítulo ás mulleres que traballan nos sectores rural e marítimo-pesqueiro.

A conselleira de Promoción do Emprego e Igualdade, Elena Rivo, tamén compareceu ante a Cámara galega a propia iniciativa para informar dos compromisos que o seu departamento mantén no eido da igualdade e para combater a violencia contra as mulleres. En 2024 incrementarase un 14,46% o orzamento para combater esta problemática, con 23,5 millóns de euros para -primeiramente- continuar habilitando prestacións económicas para as vítimas. Para avanzar na promoción da igualdade, investiranse 27 millóns de euros en 2024 para actuacións a desenvolver en colaboración cos concellos e coas organizacións do terceiro sector.

Recoñecementos

A Xunta entregou tamén esta semana na Cidade da Cultura os premios de creación gráfica e audiovisual do concurso escolar convocado co gallo do 25-N. Os once centros galardoados -da Coruña, Padrón, Lugo, Navia de Suarna e Vigo- resultaron primeiros nas diferentes categorías, nas que tamén foron recoñecidas pezas gráficas e audiovisuais de centros de Pontevedra, Nigrán, Chapela, Cospeito e Alfoz. O alumando fixo alarde do seu talento e creatividade, amosando o seu compromiso por un futuro libre de violencia.

Nos últimos días deuse a coñecer tamén o nome da galardoada co Premio Wonenburger deste ano, que recaeu na enxeñeira industrial na rama de mecánica de fluídos, catedrática e doutora pola Universidade de Vigo e directora do Centro de Tecnoloxía, Enerxía e Procesos Industriais desta mesma universidade (Cintexc), Concepción Paz Penín (Ferrol, 1969). A decisión comunicada polo último pleno da Unidade Muller e Ciencia da Xunta, tendo en conta a súa especialización nesta rama da ciencia e o seu elevado índice de impacto como investigadora, entre outras cuestións.