O secretario xeral de Apoio ao Emprego, Traballo Autónomo e Economía Social, Pablo Fernández, clausurou o acto de posta en marcha do Hub Diversidade Dixital Galicia, un evento organizado pola Confederación galega de persoas con discapacidade (Cogami), a Fundación Integralia, DKV e o Clúster TIC Galicia co apoio da Xunta de Galicia. Destacou que en 2024 a Administración autonómica destinará máis de 33 millóns de euros a apoiar e impulsar o emprego de persoas con discapacidade.

Fernández salientou a oportunidade da posta en marcha do novo Hub, que permitirá fomentar a cualificación dixital das persoas con discapacidade mediante a formación e o desenvolvemento de itinerarios de inserción. Tal e como recalcou o secretario xeral “o emprego é a mellor contribución á política social” e nesta liña, a  Xunta de Galicia está a traballar en políticas que faciliten ás persoas con dificultades as ferramentas necesarias para contar con máis e mellores oportunidades. “Trátase de darlles motivacións e tamén as competencias e capacidades para a súa inserción no mercado ordinario”, indicou.

A Consellería de Promoción do Emprego e Igualdade destinará en 2024 un total de 33,4 millóns de euros a apoiar e impulsar o emprego inclusivo. Disporá axudas á creación e mantemento do emprego en empresas de inserción e á creación e mantemento de postos de traballo en centros especiais de emprego e seguirá a promover a formación dual para persoas con discapacidade intelectual e problemas de saúde mental.

Máis de tres millóns de euros destinaranse aos incentivos que a Administración autonómica concede para a contratación de persoas con discapacidade nas empresas.

O secretario xeral mostrouse partidario de seguir a impulsar, por outra banda, os modelos inclusivos que promove a economía social por situar ás persoas no centro -antepoñendo os beneficios sociais e colectivos á rendibilidade financeira- e pola súa aposta pola igualdade de oportunidades e a diversidade.

A Consellería de Promoción do Emprego e Igualdade  está a deseñar unha nova Estratexia da economía social para fomentar en Galicia o crecemento desta fórmula e contribuír a crear novas firmas. Nesa liña, búscase incrementar o número de empregos, priorizando a actuación en determinados colectivos (xente nova, mulleres, persoas con dificultade de incorporación ao mercado laboral...) e fomentando a redistribución no territorio.

Así mesmo, trabállase na nova Lei galega de cooperativas, para axilizar a creación de entidades, así como para impulsar o seu funcionamento adaptándoas aos novos tempos.

“Desde a Xunta de Galicia somos conscientes de que potenciar as capacidades diversas dá como resultado unha sociedade máis rica e inclusiva”, dixo Pablo Fernández.