A Xunta concede axudas por máis de 2,2 M€ para axudar ás entidades locais na mellora da recollida de residuos municipais
As axudas teñen como obxectivo impulsar a economía circular no eido local e avanzar cara ao cumprimento dos obxectivos comunitarios na materia
Santiago de Compostela, 17 de novembro de 2023
A Xunta de Galicia concedeu este ano máis de 2,2 millóns de euros en axudas a entidades locais para o financiamento de actuacións en materia de residuos de competencia municipal para os anos 2023 e 2024, co fin de impulsar a economía circular no eido local e avanzar cara ao cumprimento dos obxectivos comunitarios na materia.
O Diario Oficial de Galicia publica a resolución da Vicepresidencia Segunda e Consellería de Medio Ambiente, Territorio e Vivenda pola que se fai pública a relación de subvencións concedidas ao abeiro desta orde de axudas, que recolle ao redor de 60 beneficiarios entre entidades locais municipais, supramunicipais e agrupacións de entidades locais de Galicia.
Cómpre lembrar que esta convocatoria de axudas contaba con cinco liñas de financiamento destinadas á realización de melloras nos puntos limpos existentes; á instalación de puntos limpos de proximidade; á adquisición de puntos limpos móbiles; á construción e mellora de instalacións de preparación para a reutilización ou autorreparación de residuos domésticos recollidos separadamente, e á implementación de melloras nas instalacións de tratamento existentes para incrementar a súa eficacia na recuperación de materiais contidos nos residuos municipais que se recollan de forma mesturada.