A Xunta informa aos clubs lucenses sobre o Bono Deporte de 120 euros para rapaces federados de 6 a 16 anos
A Delegación Territorial de Lugo organizou unha xornada informativa co obxecto de que as entidades e as familias coñezan este programa de axudas, que está previsto que entre en vigor en xaneiro
O delegado territorial, Javier Arias, explica que se poderá sufragar ata o 80 % das compras de material e equipamento, a asistencia a clases ou a realización de actividades deportivas
Lugo, 16 de novembro de 2023
A Delegación Territorial da Xunta organizou unha xornada informativa dirixida a clubs deportivos da provincia de Lugo para explicar os detalles do Bono Deporte de 120 euros do que poderán beneficiarse os rapaces e rapazas de 6 a 16 anos con licenza federada ou inscritos no programa Xogade. Medio cento de entidades responderon á convocatoria.
O delegado territorial de Lugo, Javier Arias, explicou que o obxectivo é divulgar esta nova medida entre as entidades e as familias, ante a previsión de que entre en vigor no mes de xaneiro.
Neste momento está aberto o proceso de selección da entidade colaboradora que participará na entrega e distribución das axudas; e o próximo mes aprobarase a orde para que os establecementos comerciais ou entidades prestadoras do servizo podan adherirse ao programa.
En total serán 120 euros por neno ou nena para a adquisición de material e equipamento deportivo ou a realización de actividades, a través dun desconto do 80% de cada compra ata esgotar esa contía. O gasto poderá realizarse en establecementos comerciais, entidades deportivas ou prestatarios de servizos deportivos radicados en Galicia que se adhiran ao Bono. O Goberno galego destina 16,2 millóns de euros a esta medida, que terá 135.000 beneficiarios en toda a Comunidade.
“A finalidade é axudar ás familias a asumir os gastos dos nenos e nenas que practican deporte”, dixo Arias. Tamén enmarcou o programa nas medidas da Xunta para fomentar a práctica de exercicio físico e para incentivar as compras no comercio galego.