O conselleiro do Medio Rural, José González, insistiu esta tarde en defender a necesidade dunha estabilidade nos prezos do leite, que garanta aos gandeiros cubrir os custos de produción e obter unha marxe de beneficio. O titular de Medio Rural, acompañado polo director xeral de Gandaría, Agricultura e Industrias Agroalimentarias, mantivo unha reunión con representantes da distribución alimentaria con presenza en Galicia.

Esta xuntanza forma parte da rolda de contactos que mantén periodicamente o Goberno galego con todos os axentes sectoriais. Segundo explicou González, trátase de impulsar este eido produtivo clave do rural galego, co fin de garantir o seu futuro e a remuda xeracional nas explotacións. Ademais, destacou que con este encontro péchase o ciclo de reunións sectoriais, tras as mantidas con representantes das organizacións profesionais agrarias e da industria.

Nesta liña, o conselleiro insistiu na idea de que sen gandeiros non hai industria nin distribución. Por iso, concluíu -tal e como sinalou este mesmo martes nunha visita a Carrefour- que é preciso apostar por un prezo axeitado para os consumidores finais, pero tamén cómpre traballar por un prezo adecuado para os gandeiros e para a industria. Engadiu que neste intre “non pode haber ningunha baixada de prezos do leite, para non entrar nunha situación de venda a perdas” por parte dos gandeiros, que ademais “legalmente non se pode consentir”, remarcou. E reiterou que a Xunta quere “ir da man” de toda a cadea de valor do leite (gandeiros, industria e distribución) para conseguir ese obxectivo de estabilidade nos prezos.

Medidas de apoio ao sector

Neste mesmo sentido, José González insistiu en que a Xunta seguirá defendendo a rendibilidade, a continuidade e a competitividade das explotacións gandeiras con diferentes medidas entre as que salientou a estratexia de dinamización do sector, que -trasladou- dá os seus froitos, con ferramentas como a Contaláctea.

Cómpre lembrar demais que o Goberno galego destina arredor de cen millóns de euros anuais ao sector e que mantén a presión sobre o Ministerio de Agricultura para que faga cumprir a Lei da cadea alimentaria. A maiores, trabállase na mobilización de terras, para incrementar a base territorial das explotacións e continúase co esforzo en liñas de fomento da actividade agrogandeira claves para o sector lácteo.

Así, cabe sinalar que en 2024 destinaranse 16 millóns de euros a fomentar a incorporación de mozos ao agro, outros 32,6 millóns de euros para apoiar a transformación e comercialización de produtos agrarios e 27 millóns máis para financiar investimentos produtivos en explotacións. A todo isto cómpre engadir que a Xunta colaborará en novas campañas de promoción do leite galego.