O delegado territorial da Xunta e o xerente da área sanitaria de Ourense, Verín e Valdeorras reúnense co alcalde de Xinzo de Limia para abordar a situación asistencial da especialidade de Pediatría no centro de saúde
O delegado territorial e o xerente explicáronlle ao alcalde que se intentará cubrir temporalmente con prolongacións de xornada doutros profesionais da contorna mentres se trata de ocupar esa praza mediante a oferta pública de emprego ordinaria
Galicia é unha das poucas comunidades onde a atención pediátrica nos centros de saúde é realizada en case o 90% dos casos especificamente por especialistas en pediatría
O delegado territorial da Xunta en Ourense, Gabriel Alén, e o xerente da área sanitaria de Ourense, Verín e Valdeorras, Félix Rubial, mantiveron esta mañá unha reunión co alcalde de Xinzo de Limia, Amador Díaz, para abordar a situación asistencial da especialidade de Pediatría no centro de saúde de Xinzo de Limia.
Ante a situación de baixa médica dun dos facultativos, o delegado territorial e o xerente explicáronlle ao alcalde que se intentará cubrir temporalmente con prolongacións de xornada doutros profesionais da contorna mentres se trata de ocupar esa praza mediante a oferta pública de emprego ordinaria, o vindeiro concurso de traslados ou, de ser necesario, un concurso de méritos específico sen oposición utilizando a Lei de medidas urxentes para prazas de difícil cobertura que aprobou a Xunta en 2022.
Gabriel Alén e Félix Rubial salientaron que dende a Xunta faise unha aposta decidida polos pediatras de atención primaria, e isto é por todos coñecidos xa que Galicia conta cunha das taxas máis baixas de ocupación de prazas de pediatría por parte de médicos de familia.
Galicia é unha das poucas comunidades onde a atención pediátrica nos centros de saúde é realizada en case o 90% dos casos especificamente por especialistas en Pediatría. E no 10% restante, a atención é realizada por médicos especialistas en Medicina Familiar e Comunitaria, cunha formación sólida no campo da Pediatría.
O número de pediatras en Galicia mantense a pesar do descenso da natalidade. Aínda así, sinalar unha vez máis que o Servizo Galego de Saúde está na continua procura de pediatras tanto para substituír os profesionais de baixa como para cubrir as vacantes que van quedando libres.
Imaxes relacionadas
