Santiago de Compostela, 8 de novembro de 2023

A Consellería do Medio Rural, a través da Axencia Galega da Calidade Alimentaria, está a preparar a XXII edición das Catas de Meles e a XXVI das Catas de Queixos, que recoñecerán neste mesmo mes aos mellores produtos galegos nestes dous ámbitos.

Os equipos de recollida de mostras da Axencia comezarán mañá, 9 de novembro, a facer este traballo. Ata o 14 de novembro, desprazaranse polas máis de 50 industria, entre envasadoras de meles e queixerías de toda Galicia, que están inscritas nestas catas e das que se coñecerán os premiados os días 14, no caso dos meles, e o 15, nos queixos.

Na Cata de Meles participarán 52 mostras -31 monoflorais e 21 multiflorais- pertencentes a 25 industrias da Indicación Xeográfica Protexida Mel de Galicia. O 64% das envasadoras que forman parte da IXP estarán presentes nestas catas.

En canto á Cata de Queixos, as mostras comezarán a recollerse no 13 de novembro, xusto antes do inicio das catas e co único obxectivo de manter as mostras nas mellores condicións para as degustacións. Na cata haberá 18 mostras da Denominación de Orixe Protexida (DOP) Queixo Tetilla, 20 serán da DOP Arzúa-Ulloa -catro deles curados-, seis da DOP San Simón da Costa e, finalmente, haberá dúas da DOP Cebreiro.  

Preto de 30 queixerías participan nesta cata, estando algunha delas en máis dunha denominación de orixe. O resultado é que o 80% das queixerías inscritas nalgunhas destas denominacións de orixe, estará presente na cata. 

O desenvolvemento das catas será baixo un total anonimato das mostras, cun sistema de numeración e remuneración de mostras que garante a imparcialidade do proceso de principio a fin. 

Aposta pola calidade

A través destas catas resáltase a importancia de promocionar, identificar e premiar os mellores queixos e meles como uns produtos dotados dun carácter único e dunha personalidade recoñecible dentro e fóra da comunidade. Así, a organización outorgará un trofeo e diploma que indique o posto acadado, dependendo do lugar e da categoría na que se atopen os participantes.

Este tipo de propostas poñen en valor a calidade dos produtos galegos, algo polo que a Xunta aposta decididamente. Exemplo diso é a nova Lei de calidade alimentaria, que está en tramitación no Parlamento, e que busca dotar aos produtos alimentarios galegos dunha nova dimensión no mercado, máis competitiva e atractiva.