A Xunta reforza o seu compromiso co concello de Aranga financiando actuacións con máis de 281.000 euros para mellorar os seus servizos municipais
O delegado da Xunta visitou o pavillón municipal da Castellana no que se está a executar unha obra de mellora da eficiencia enerxética cunha axuda do Goberno galego de 140.000 euros
O delegado da Xunta, Gonzalo Trenor, visitou hoxe o pavillón polideportivo da Castellana de Aranga para supervisar as obras de eficiencia enerxética que se están levando a cabo cun apoio da Xunta de 140.000 euros e que se inclúen dentro da orde de axudas do Fondo Adicional do Fondo de Cooperación Local, da liña dirixida á mellora da eficiencia enerxética dos edificios de titularidade municipal.
Ademais, desta mesma orde, Aranga conta con outra achega de 29.000 euros para a adquisición de maquinaria para a limpeza de viais da liña reservada para a adquisición de maquinaria e equipamento, incluíndo vehículos, para a prestación de servizos públicos. E outros 46.000 euros para a reforma da estación de tratamento de auga potable na Castellana
O delegado aclarou que Galicia foi unha comunidade pioneira en establecer un instrumento de financiamento estable das entidades locais a través do Fondo de Cooperación Local. Regulado anualmente a través das leis de orzamentos da comunidade establecendo un modelo de participación estable das entidades locais nos tributos autonómicos.
Fondo Compensación Ambiental
Segundo sinalou o delegado este municipio tamén conta, a través do Fondo de Compensación Ambiental, con dúas axudas que suman máis de 66.000 euros para financiar servizos municipais dedicados á protección do medio ambiente. Concretamente para a mellora da iluminación municipal e para obras da traída de augas municipal na parroquia de Vilaraso.
Entre os obxectivos que deben perseguir estes apoios figuran a conservación da biodiversidade, o fomento do coñecemento e da utilización recreativa e didáctica dos recursos naturais, e a recuperación do medio natural degradado ou contaminado. Tamén deben impulsar a eficiencia e o uso sustentable das enerxías renovables, e, en xeral a protección do medio.
O Fondo de Compensación Ambiental foi posto en marcha pola Xunta en 2010 para distribuír os ingresos do canón eólico para proxectos que teñen un efecto exemplarizante ao contribuír a concienciar á veciñanza da repercusión sobre o medio ambiente das medidas de eficiencia enerxética e de impulso da sustentabilidade nas administración públicas, en concreto nas entidades locais.
O delegado da Xunta incidiu na importancia da colaboración entre a Xunta e os concellos para levar a cabo actuacións que redunden no benestar da veciñanza. Nesta liña, sinalou que estes apoios son fundamentais sobre todo para os concellos máis pequenos para que poidan levar a cabo iniciativas que en solitario lles resultaría máis complicado ou non serían posibles.
O delegado da Xunta enmarcou estas actuacións no compromiso da Xunta coas administracións locais a través de distintas liñas de acción, como son as convocatorias de axudas específicas, entre as que figuran a Orde de infraestruturas de uso público o Fondo de Compensación Ambiental, e o Fondo de Cooperación Local. Así, ao longo de 2023 distribuíronse entre os concellos de Galicia máis de 27,2 millóns de euros para a execución de máis de 600 proxectos a prol de mellores infraestruturas e servizos de carácter municipal.