A directora de Augas de Galicia, Teresa Gutiérrez, presidiu unha nova reunión da Oficina Técnica da Seca, na que se constatou unha mellora xeral na situación da Demarcación Hidrográfica Galicia-Costa
A mellora das reservas de auga permite recuperar a normalidade e desactivar a prealerta por escaseza no sistema de abastecemento do Lérez e no do río Grande, ría de Camariñas e costa da Coruña ata o río Anllóns
As chuvias da terceira semana de outubro produciron un incremento importante dos caudais circulantes, a nivel xeneralizado, prevéndose que continúe este ascenso coas precipitacións que se agardan para as vindeiras semanas
No caso dos municipios do sistema do río Mero, Arteixo e ría da Coruña, mantense a situación de alerta por escaseza, pois a recuperación do encoro de Cecebre non é, polo de agora, a necesaria
O sistema de abastecemento do río Anllóns, costa da Coruña ata o límite de Arteixo mellora a situación, pasando de alerta por escaseza ao nivel de prealerta
Mantéñense as medidas equivalentes a un escenario de prealerta por escaseza no subsitema de Baiona
O resto dos sistemas de abastecemento da demarcación Galicia-Costa presentan niveis normais, cunha ocupación dos encoros de 63,96%, 5,52 puntos por riba con respecto ao mesmo período do ano anterior
A Xunta continuará realizando un seguimento continuo da situación meteorolóxica e hidrolóxica e promovendo un consumo responsable da auga
Santiago de Compostela, 25 de outubro de 2023
A Xunta constata unha mellora nas reservas de auga que permite recuperar os niveis de normalidade e desactivar a prealerta por escaseza no sistema de abastecemento do río Lérez e no do río Grande, ría de Camariñas e Costa da Coruña ata o río Anllóns.
A Oficina Técnica da Seca celebrou hoxe unha nova reunión que presidiu a directora de Augas de Galicia, Teresa Gutiérrez, acompañada do xerente da entidade hidráulica da Xunta, Gonzalo Mosqueira, e na que participaron tamén representantes de Protección Civil, Meteogalicia, a Consellería do Medio Rural e a Consellería de Sanidade.
No encontro ratificouse que, tras as chuvias rexistradas na terceira semana de outubro, se produciu un incremento importante dos caudais circulantes, de modo xeneralizado, prevéndose que continúe esta liña de ascenso coas precipitacións que se agardan nas vindeiras semanas.
Unha vez avaliados os indicadores hidrolóxicos e meteorolóxicos na Demarcación Hidrográfica Galicia-Costa, de titularidade autonómica, a Oficina Técnica da Seca acordou hoxe pasar á situación de normalidade estes dous sistemas de abastecemento.
No caso do sistema de abastecemento do río Mero, Arteixo e ría da Coruña, mantense a situación de alerta por escaseza de auga activada recentemente, ao non acadarse, polo momento, a melloría necesaria no encoro de Cecebre.
No sistema de abastecemento do río Anllóns, Costa da Coruña ata o límite de Arteixo tamén se constata unha melloría da situación, pasando do nivel de alerta por escaseza a manterse simplemente en prealerta.
Tamén se manteñen as medidas equivalentes a un escenario de prealerta ou escaseza moderada no subsistema de Baiona, situado no sistema de explotación do río Verdugo, Ría de Vigo e Ría de Baiona, desde o cal se abastece o concello de Baiona.
O resto dos sistemas de abastecemento da demarcación de competencia autonómica presenta niveis de normalidade.
A ocupación actual dos encoros de abastecemento de Galicia-Costa é do 63,96%, 5,52 puntos por riba da ocupación do mesmo período para o ano 2022.
A pesar da mellora xeneralizada das reservas de auga na demarcación hidrográfica de competencia autonómica, Galicia-Costa, a Xunta continuará realizando un seguimento continuo da situación meteorolóxica e hidrolóxica e promovendo un consumo responsable.
Imaxes relacionadas
