A Xunta e a Universidade de Vigo están a organizar desde onte un curso sobre Responsabilidade Social Empresarial que se estrutura en tres sesións. A segunda delas, baixou o título Elaboración do informe de Sustentabilidade Empresarial, tivo lugar hoxe na Facultade de Comercio de Vigo. A directora xeral de Relacións Laborais, Elena Mancha, asistiu á apertura, onde destacou a importancia de que as empresas conten con profesionais que coñezan as obrigas dos informes anuais de sustentabilidade no marco da nova directiva europea vinculada aos obxectivos do Green Deal.

Trátase dun curso de formación gratuíto de 4 horas no que están a participar un cento de persoas (estudantes, profesores, persoal docente de investigación...). A primeira sesión tivo lugar onte na Facultade de Ciencias Empresariais e Turismo de Ourense e mañá celebrarase a terceira e última na Facultade de Ciencias Económicas e Empresariais (Cuvi).

Mancha sinalou que a promoción da igualdade laboral é un reto que só se conseguirá da man de empresas responsables e, neste senso, referiuse á Estratexia Autonómica de Responsabilidade Social Empresarial 2023-2025 coa que a Xunta busca precisamente sensibilizar á empresa en materia de transparencia e desenvolver contornas de traballo inclusivas e igualitarias. Esta planificación quintuplica a súa dotación orzamentaria ata os 174 millóns de euros para favorecer a competitividade das empresas e atraer talento.