Santiago de Compostela, 26 de setembro de 2023

Os instrumentos da Lei de recuperación da terra agraria -tales como as aldeas modelo, os polígonos agroforestais, as agrupacións de xestión conxunta e as permutas-, xunto coas concentracións parcelarias están permitindo mobilizar arredor de 35.000 hectáreas en toda Galicia. Así o destacou esta mañá o conselleiro do Medio Rural, José González, na súa intervención na xornada “Soberanía alimentaria europea: o papel da agricultura, a pesca e os consumidores”, que se desenvolve na Cidade da Cultura. Este encontro está organizado polo Grupo de Organizacións da Sociedade Civil do Comité Económico e Social Europeo (CESE) no contexto da Presidencia española do Consello da Unión Europea.

Na súa intervención, o conselleiro salientou que con este labor estase posibilitando a fixación de poboación e contrarrestando, dese modo, o reto demográfico. Ademais, sinalou que se está “colocando cada uso na súa localización máis produtiva”, algo que incide na prevención dos incendios, e remarcou, neste sentido, que “a xestión activa do territorio é tamén unha vía fundamental para a prevención”.

Produción de calidade

A maiores, José González incidiu en que esta actividade en moitos casos -sobre todo nos proxectos dos polígonos- está destinada á produción de calidade. Neste contexto, puxo en valor as 37 certificacións de calidade con que conta Galicia e a Lei da calidade alimentaria, que -lembrou- acaba de entrar no Parlamento. Sinalou que esta norma está deseñada, precisamente, para mellorar os controis e as garantías dos alimentos, así coma outros aspectos importantes, como son a sustentabilidade da súa orixe, a dixitalización ou a rastrexabilidade.

De igual modo, o conselleiro trasladou que a esta perspectiva da terra engádese a “industrial”, que a Xunta centrou nas diferentes estratexias sectoriais para produtos coma o leite, o viño e a carne. Así, en relación coa primeira, recordou que Galicia é líder nacional, con máis do 40% da produción de toda España, e que ocupa tamén un lugar destacado como unha das principais rexións lácteas de Europa.

Con respecto á Estratexia de dinamización económica, territorial e turística das comarcas vitivinícolas, dixo que pretende consolidar a Galicia como rexión produtora de viños de calidade e como principal destino enoturístico. Sobre a estratexia para o sector cárnico, González subliñou que persegue posicionar a nosa comunidade como referente neste eido, partindo da súa condición de principal territorio español produtor de carne de calidade e do feito de que Ternera Gallega é o indicativo de calidade que máis certifica en España, con preto do 60%.

Neste sentido, o conselleiro incidiu no enfoque destas estratexias cara a profesionalización do sector, con iniciativas como as aplicacións web -totalmente gratuítas e accesibles- para o cálculo dos custos de produción, Contaláctea e Contacarne. Ambas -destacou- enfocadas cara unha visión do agricultor e do gandeiro como un empresario, que debe acadar marxes de beneficio proporcionados, algo que “revertirá directamente na nosa soberanía alimentaria”, remarcou.

“Ser despensas de nós mesmos”

Precisamente, con respecto á soberanía alimentaria, José González resaltou a importancia do sector primario -sen o cal, aseverou, “dificilmente poderían existir o secundario e o terciario”- e a relevancia que ten “ser despensas de nós mesmos”. Por iso, referiuse tamén aos puntos clave do desenvolvemento deste eido produtivo.

Nesta liña, falou da necesidade dunha industria alimentaria “capacitada, rendible e competitiva, pero tamén sustentable”, así como do que comporta “ter acceso digno, seguro e con todas as garantías a todo tipo de alimentos”, cara a conseguir, en definitiva, “unha soberanía alimentaria na que o consumidor posúa plena capacidade de decisión e control”.

Todo isto conséguese, concluíu o conselleiro, mediante un compromiso con todos os agricultores e gandeiros de Galicia de forma que, traballando “para potenciar a súa actividade non só aseguramos a súa digna subsistencia, senón que estamos garantindo a nosa propia seguridade alimentaria”.