O director da Axencia Galega da Calidade Alimentaria e o director xeral de Pesca, Acuicultura e Innovación Tecnolóxica asistiron ao evento
A Xunta pon de relevo a gastronomía galega no Círculo de Empresarios de Vigo
Os directores interviñeron no relatorio Conversación estratégica 01: Una cadena de valor que comienza en el campo o en el mar
Cabarcos destacou a importancia da gastronomía galega, amparada en moitos casos por selos de calidade alimentaria, e que supón un dos piares da economía da comunidade
O director xeral de Pesca salientou os beneficios para a saúde dos produtos do mar e a importancia de promover o seu consumo a través de campañas como a impulsada pola Xunta GALICIA SABE AMAR
O director da Axencia Galega da Calidade Alimentaria, José Luis Cabarcos, acompañado do director xeral de Pesca, Acuicultura e Innovación Tecnolóxica, Antonio Basanta, participou no Ciclo de Jornadas 01 Galicia con valor añadido sobre gastronomía, centrándose na restauración, bodegas e turismo, organizado polo Círculo de Empresarios de Galicia.
Os directores interviñeron no relatorio Conversación estratégica 01: Una cadena de valor que comienza en el campo o en el mar. Pola súa parte, José Luis Cabarcos puxo de relevo a importancia da gastronomía galega, amparada en moitos casos pos selos de calidade diferenciada, e que supón un dos piares da economía da comunidade, apoiado por parte da Xunta de Galicia a través de instrumentos como a Lei de recuperación da terra agraria e a futura Lei da calidade alimentaria.
O director xeral de Pesca, Acuicultura e Innovación Tecnolóxica salientou os beneficios para a saúde que teñen os produtos do mar e a importancia de promover o seu consumo entre o conxunto da poboación con campañas como a impulsada pola Xunta GALICIA SABE AMAR. Este tipo de iniciativas, incidiu, contribúen a poñer en valor os peixes e mariscos galegos, a impulsar a súa demanda, elevar os seus prezos e mellorar os ingresos dos profesionais do mar, o que beneficia ao conxunto da economía.
Este ciclo de relatorios, celebrado no Círculo de Empresarios de Vigo, enmárcase dentro do programa “Capacita Directivos 2023” e nesta xornada puxo o foco sobre o proceso de transformación polo que pasa a materia prima antes de converterse en produto. O obxectivo final é analizar como Galicia foi creando cadeas de valor, dende sectores primarios ata chegar a ofrecer servizos de alta calidade que constitúen un reclamo por si mesmos. Neste caso, céntranse na gastronomía galega, que conta cun prestixio recoñecido incluso máis alá das nosas fronteiras.