A delegada da Xunta pide ao Concello de Redondela que desbloquee a humanización da Avenida de Vigo
Ana Ortiz mantivo este martes unha xuntanza coa alcaldesa de Redondela dentro da rolda de reunións con todos os rexedores da área territorial
A delegada territorial da Xunta de Galicia en Vigo, Ana Ortiz, reclamou este martes ao Concello de Redondela que desbloquee a humanización da Avenida de Vigo para complear as obras de mellora xa iniciadas no ano 2018. Así o fixo durante a xuntanza que mantivo hoxe coa alcaldesa, Digna Rivas, no marco da rolda de contactos que a representante autonómica leva a cabo con todos os rexedores da área territorial.
Ana Ortiz amosou a disposición da Xunta a abordar a humanización da Avenida de Vigo, en Redondela, cando o Concello entregue un proxecto redactado e se comprometa a colaborar no financiamento das intervencións.
Tamén lembrou que en 2018 a Xunta rematou unha primeira fase de mellora e humanización da Avenida de Vigo, ao longo de 1 quilómetro da PO-323 ao seu paso por Redondela, como resultado do convenio de colaboración asinado no seu momento co Concello.
Segundo resaltou, o acordo acadado entre as dúas administracións, autonómica e local, posibilitou acometer esa intervención, que supuxo un investimento de 2 millóns de euros, dos cales 370.000 euros foron achegados polo Concello de Redondela.
Ana Ortiz xa mantivo anteriormente encontros cos máximos responsables municipais de Baiona, Cangas, Moaña, Mos, O Porriño, Salvaterra de Miño, Nigrán e Vigo despois de dirixirse por carta a todos os alcaldes da área territorial para poñer en común as súas axendas e fixar o antes posible unha xuntanza de traballo.