Santiago de Compostela (A Coruña), 28 de agosto de 2023.- A directora xeral de Xuventude, Participación e Voluntariado, Cristina Pichel, reuniuse cos mozos e mozas participantes do programa da Xunta “A Xuventude no mundo”, que os levará a Xapón do 1 ao 6 de setembro nun intercambio cultural.

Os 20 participantes de Galicia, acompañados dunha monitora, viaxarán á prefectura de Wakayama en Xapón, onde realizarán múltiples actividades culturais entre as que destaca o percorrido por un tramo do Kumano Kodo -unha ruta de peregrinación similar ao Camiño de Santiago que percorre os tres grandes santuarios xintoístas-, visitarán lugares tradicionais da cultura xaponesa e asistirán a encontros con mozos locais e con autoridades.

A Consellería de Política Social e Xuventude recupera esta iniciativa tras un parón de tres anos motivado pola pandemia, que impedía as viaxes a este país. Os participantes teñen idades comprendidas entre os 18 e 30 anos.

Na reunión preparatoria mantida coa directora xeral tratáronse temas de interese para a organización e desenvolvemento deste programa. O obxectivo do mesmo é facilitar aos mozos o coñecemento doutras realidades socioculturais e lingüísticas para a comprensión da diversidade, ademais de potenciar a adquisición de competencias non formais que faciliten o desenvolvemento persoal dos mozos e mozas.

O camiño Kumano Kodo

O programa leva por título “O camiño Kumano Kodo irmandado co Camiño de Santiago”, no que os mozos e mozas participantes percorren un tramo da famosa ruta de peregrinación xaponesa, similar ao Camiño de Santiago, que discorre polos tres grandes santuarios xintoístas do país do sol nacente.

Esta actividade é posible ao abeiro das relacións bilaterais que a Xunta de Galicia mantén con entidades doutros países. A Xunta cobre o aloxamento en pensión completa e todas as actividades organizadas pola entidade de acollida.