O delegado territorial da Xunta en Pontevedra, Agustín Reguera, participou na presentación do III Rallymix de Portas, un acontecemento que terá lugar esta fin de semana e que concentrará en Portas a centos de persoas, entre aficionados e corredores e que conta co apoio da Xunta de Galicia.

Á presentación, que tivo lugar na bodega Terras de Lataño, patrocinadora do evento, acudiu o alcalde de Portas, Ricardo Martínez Chantada; o presidente da escudaría Portas Motor, Alberto Alonso; o presidente da Federación Galega de Automobilismo, Antonio Rodríguez; e o delegado territorial da Xunta en Pontevedra, Agustín Reguera.

Durante a súa intervención, Reguera agradeceu o gran traballo de todos os involucrados, que en apenas tres anos conseguiron “poñer a Portas no mapa dos Rallys, cun evento que cada ano gaña adeptos e que trae moita vida ao Concello”. Ademais, o delegado territorial lembrou que “dende a Xunta somos conscientes de que este é un deporte que move unha gran afición, unha afición que ademais está moi unida e que promove un ambiente moi san. Estamos dispostos a facer todo o posible para que Galicia siga sendo un referente a nivel nacional”.

O Rallymix Portas é un rally mixto, xa que o tramo conta cunha parte de terra e outra de asfalto. Nesta ocasión, pese a que o trazado atopase principalmente dentro dos límites do concello de Portas, os corredores terán que cruzar durante algúns metros ao concello de Barro. Esta será a edición con maior participación das que se celebraron ata o momento. Está previsto que compitan máis de 90 vehículos entre os ‘Carcross’ e os coches carrozados.

Así, durante toda a fin de semana os vehículos estarán percorrendo un tramo de preto de 11 quilómetros, dos cales o 80 % corresponde a pistas de terra. En total, cada vehículo terá que facer o recorrido cinco veces, tres o sábado e dúas o domingo.