O delegado territorial da Xunta en Pontevedra, Agustín Reguera, visitou esta mañá o Programa Cuntilín, unha iniciativa financiada grazas ao Plan Corresponsables da Xunta e que busca mellorar a conciliación familiar dos veciños e veciñas de Cuntis.

O Plan Corresponsables no ámbito local financiou con 102.093 euros esta iniciativa que durante o verán mantivo a decenas de cativos entretidos e gozando de todo tipo de actividades deportivas e de lecer. Máis alá do Concello de Cuntis, o Plan Corresponsables deixou na comarca de Caldas máis de 360.000 euros destinados a facilitar a organización interna das familias. O total en iniciativas relacionadas coa conciliación e a actividade infantil na provincia de Pontevedra a través do Plan Corresponsables superou o millón de euros.

Xunto ao novo xefe territorial de Promoción do Emprego e Igualdade, José Antonio Rodríguez, e ao alcalde de Cuntis, Manuel Campos, o delegado destacou os grandes resultados desta iniciativa. “Cada vez é máis necesario que as institucións ofrezan alternativas de conciliación ás familias. Sabemos que as vacacións escolares poden supoñer para moitos un problema de organización familiar e por iso este tipo de iniciativas financiadas grazas ao Plan Corresponsables son tan importantes, porque non só supoñen unha axuda para os pais e nais, senón que tamén ofrecen unha alternativa de ocio para moitos mozos e mozas que despois de todo o curso merecen gozar do verán”.

A visita tivo lugar no C.P.I Aurelio Marcelino Rey García, onde decenas de nenos e nenas pasaban unha mañá de xogos cos seus amigos. O Programa Cuntilín arrincou o 22 de xuño e prolóngase ata o día 8 de setembro, coincidindo coa volta ás aulas de moitos dos participantes. Durante este tempo os beneficiarios desta iniciativa participaron en actividades, xogos e visitas lúdicas dende as 9.00 ata as 14.00 horas.