Vigo, 26 de xullo de 2023 A directora xeral de Relacións Laborais, Elena Mancha, mantivo hoxe unha xuntanza co director da Inspección Provincial de Traballo e Seguridade Social de Pontevedra, Demetrio Fernández, para abordar as actuacións que desenvolven de xeito coordinado en materia de prevención de riscos, relacións laborais e igualdade na provincia. Así, constataron que as actuacións inspectoras se incrementaron un 14,7% no primeiro semestre do 2023 en comparación co mesmo período do ano pasado, mentres os requirimentos polos incumprimentos detectados subiron un 38,5%.

Na xuntanza, que forma parte dos contactos mantidos coas catro inspeccións de traballo provinciais para coordinar os asuntos comúns e na que tamén participaron as xefas de unidade de Seguridade Social e de Seguridade e Saúde da Inspección Provincial de Pontevedra, Paula Rodríguez e Carolina Álvarez respectivamente, destacouse o importante aumento das inspeccións en materia de prevención de riscos laborais. En concreto, en Pontevedra as actuacións nesta competencia subiron un 66% (ata as case 7.600), os requrimentos un 39,7% (ata preto dos 2.300) e os expedientes sancionadores un 4,3% (ata case 200), nun contexto marcado polo aumento do número de subinspectores e subinspectoras con especialización en seguridade e saúde laboral en toda Galicia.