A Xunta publica a aprobación da senda cara ao Hospital Clínico Universitario de Santiago desde o eixe de mobilidade sostible O Milladoiro-Intermodal, cun investimento de máis de 1 M€
Executarase un itinerario de 1.130 metros no eixe Conxo-Hospital Clínico, entre o antigo túnel de Adif e o barrio de Santa Marta, unindo numerosos puntos de interese da cidade, ao longo do eixe de mobilidade norte-sur
As obras licitaranse ao longo do verán co obxectivo de comezar os traballos no primeiro trimestre de 2024
A nova intervención divídese en tres subtreitos, unindo o primeiro o túnel de Adif e o río Sar; o segundo, ata o disuasorio de Santa Marta; e logo ata a avenida da Liberdade
Atendendo ás achegas recibidas, segregarase o itinerario nos treitos nos que sexa viable, como a conexión directa en baixada desde a senda do treito O Milladoiro-estación intermodal, ou o treito comprendido entre o quilómetro 0+390 e 0+980
Adaptarase o trazado no cruce sobre o río Sar, aproveitando a pontella existente, suprimindo a pasarela prevista no proxecto de trazado sometido a información pública e evitando así a implantación dun novo itinerario na zona inundable deste río
En atención ás suxestións do Concello de Santiago, axustarase o trazado no treito final eliminando a franxa verde de separación entre a beirarrúa e o carril bici para reducir a ocupación nalgún dos ámbitos na contorna de Santa Marta
Será a terceira actuación no marco da creación do eixe de mobilidade sostible que conectará O Milladoiro, o hospital, a intermodal e o complexo de San Caetano, case 13 km de itinerarios que suporán un investimento global da Xunta de preto de 12 M€
A Xunta publica hoxe no Diario Oficial de Galicia (DOG) a resoluciónda aprobación definitiva do proxecto para conformar o treito de senda de acceso ao Hospital Clínico Universitario de Santiago desde o novo eixe de mobilidade sostible entre O Milladoiro e a estación intermodal, que suporá un investimento de máis de 1 millón de euros.
A aprobación definitiva do proxecto, á que deu luz verde hai dúas semanas o Consello da Xunta, implica a declaración de utilidade pública.
O investimento de máis de 1 M€ inclúe o pagamento dos 77 predios necesarios para impulsar un itinerario de aproximadamente 1.130 metros de lonxitude, que permitirá a circulación de peóns, ciclistas non deportivos e vehículos de mobilidade persoal no eixe Conxo-Hospital Clínico; concretamente, entre o antigo túnel de Adif e o barrio de Santa Marta, comunicando numerosos puntos de interese da cidade ao longo do eixe de mobilidade norte-sur.
No seguinte enlace pode consultarse a información relativa a esta resolución do DOG: https://www.xunta.gal/dog/Publicados/2023/20230726/AnuncioG0533-180723-0001_gl.html
A Consellería de Infraestruturas e Mobilidade prevé licitar as obras ao longo deste verán para iniciar os traballos no primeiro trimestre de 2024. A convocatoria dos actos de levantamento de actas previas das expropiacións realizarase no cuarto trimestre do ano.
En concreto, os dous primeiros tramos deste novo eixe de mobilidade, cuxas obras están xa licitadas e en fase de contratación, correspóndense co tramo da conexión entre O Milladoiro e a estación intermodal; e o segundo treito, co itinerario desde a rúa Clara Campoamor, na estación intermodal, ata San Caetano.
As actuacións do treito da senda de acceso ao CHUS
De xeito xeral, a conexión que permitirá alcanzar o Hospital Clínico Universitario de Santiago desde o novo eixe de mobilidade sostible entre O Milladoiro e a intermodal comezará no antigo túnel de Adif e finalizará na avenida da Liberdade, no barrio de Santa Marta, nas proximidades do centro hospitalario.
Este itinerario divídese en tres subtreitos, conectando o primeiro o túnel de Adif e o río Sar; o segundo, ata o aparcadoiro disuasorio de Santa Marta; e o terceiro ata a avenida da Liberdade.
As actuación que se realizarán ao longo do trazado incluirán as obras de pavimentación e integración paisaxística, a execución do sistema de drenaxe das augas pluviais, así como de iluminación pública e instalación de mobiliario urbano. Tamén se procederá á reposición dos servizos afectados pola execución dos traballos.
Tras a análise das achegas recibidas durante o trámite de información pública, vaise proceder á segregación do itinerario peonil e ciclista nos treitos nos que sexa viable, como son a conexión directa en baixada desde o itinerario do treito O Milladoiro-estación intermodal, e o treito comprendido entre o quilómetro 0+390 e 0+980.
Adaptarase o trazado na contorna do cruce sobre o río Sar, de xeito que o itinerario tanto peonil como ciclista aproveiten a pontella existente, suprimindo a pasarela prevista no proxecto de trazado sometido a información pública e evitando así a implantación dun novo itinerario na zona inundable deste río.
Atendendo ás suxestións presentadas polo Concello de Santiago, de reducir a ocupación nos ámbitos DM-2 e ZL-5 do Plan Parcial do SUP-6 de Santa Marta, tamén se vai axustar o trazado no treito final, eliminando a franxa verde de separación entre a beirarrúa e o carril bici.
Estas intervencións, promovidas pola Xunta ao abeiro do programa europeo dos Fondos Next Generation, teñen como obxectivo favorecer desprazamentos menos contaminantes nas cidades galegas e nas súas contornas, fomentando a diminución de emisións de gases á atmosfera.
O departamento de Infraestruturas da Xunta continúa avanzando na materialización e desenvolvemento do eixe de mobilidade sostible, que está consensuado co Concello de Santiago, co obxectivo de crear na cidade un percorrido exclusivo para peóns e ciclistas de novo trazado, pendentes moderadas e sen apenas interacción co tráfico rodado.
Todas as actuacións desenvolveranse de xeito coordinado, tendo en conta que o prazo de execución do tramo de conexión entre O Milladoiro e a estación intermodal é de 18 meses; o do segundo treito, entre a intermodal e San Caetano, de 15 meses; e este terceiro treito de acceso ao Hospital Clínico Universitario de Santiago, de 14 meses.