Santiago de Compostela, 19 de xuño de 2023 A Xunta licitou hoxe por 1.390.640 euros as obras de demolición do actual Hotel de Doentes, necesarias para construír o anel perimetral que bordeará o novo Hospital Público da Coruña, o Novo CHUAC.

A Plataforma de Contratos Públicos de Galicia publica hoxe esta contratación, á que as empresas interesadas poderán presentar as súas ofertas ata o 1 de setembro. Os traballos contan cun prazo de execución de 7 meses.

En concreto, esta actuación contempla a demolición do actual edificio que conta de 7.691 m² construídos divididos en 10 andares, dous deles baixo rasante.

As obras obxecto deste contrato realizaranse tendo en conta as vías de acceso e están planificadas para non interromper o funcionamento do complexo e minimizar a xeración de pó e ruído.

En concreto, as obras de demolición levaranse a cabo do xeito máis eficiente e sostible, optando por un criterio de derriba elemento a elemento. Así, os traballos seguirán a orde inversa á que corresponde cunha obra nova, procedendo desde arriba cara a abaixo e procurando que a derruba se realice ao mesmo nivel.

Os traballos de demolición executarase en dúas etapas, derrubando na primeira o volume correspondente ao salón de actos e unha parte do bloque administrativo, composta de 3 plantas, para dispoñer dunha zona máis ampla para a manobra da maquinaria e a realización dos traballos. Na segunda fase acometerase a derriba do resto dos bloques: o chamado bloque alongado e o resto das dependencias administrativas.

Para a execución de cada unha das etapas seguirase un plan de 5 fases empezando pola de desamiantado. Unha segunda fase corresponderá á demolición interior para minimizar as afeccións, xa que se realizará conservando todo o cerramento exterior da fachada. A terceira fase será a demolición exterior, á que lle seguirá a estrutura. A última consistirá na formación dunha plataforma realizada con produtos procedentes da demolición e posterior acabado mediante pavimento asfáltico, realizando un estendido de terra vexetal sobre os taludes para adecuar a área afectada polos traballos. 

Proxecto estratéxico e hospital de vangarda

A demolición do actual Hotel de Doentes, que será reubicado na Torre Polivalente, é necesaria para habilitar o espazo preciso para a execución dos accesos do Novo CHUAC.  

Este é o terceiro contrato do Novo Hospital Público da Coruña que se activa neste mes de xullo, unha vez licitadas as obras da Torre Polivalente o pasado día 10 por 35,1 M€, e este mesmo luns, o contrato de proxecto construtivo e de execución das obras dos accesos por importe de 24,8 M€. 

Trátase, polo tanto, das 3 primeiras obras do novo Hospital Público da Coruña que supoñen un investimento de máis de 60 M€ e xerarán máis de 900 postos de traballo.  

O Novo CHUAC é un proxecto estratéxico e prioritario xa en marcha no que están a traballar, conxuntamente, as Consellerías de Sanidade e de Infraestruturas, cun investimento de máis de 500 M€ para blindar a atención sanitaria da área da Coruña e Cee nas vindeiras décadas, para dar atención a máis de 550.000 pacientes.