A Vicepresidencia segunda e Consellería de Medio Ambiente, Territorio e Vivenda segue a avanzar no desenvolvemento do Plan reitor de usos e xestión (PRUX) das Fragas do Eume coa mellora dun dos puntos máis emblemáticos de cantas rutas de sendeirismo percorren este parque natural, a ponte colgante Cal Grande.

A delegada territorial da Xunta en Ferrol, Martina Aneiros, achegouse onte ata a zona onde se van a desenvolver os traballos que permitirán mellorar a accesibilidade e seguridade dos viandantes e pescadores mediante a renovación do sistema de suspensión da ponte co que se poderá potenciar a práctica das distintas actividades que se poidan realizar na zona.

Para iso procederase ao desmonte secuencial do taboleiro, varanda, péndolas e cordón de sustentación desta infraestrutura para a súa substitución por novos elementos. A obra, que suporá un investimento superior aos 100.000 euros e conta cun prazo de execución de seis meses, comezará previsiblemente o próximo mes de agosto.

A ponte colgante Cal Grande e a de Fornelos, ambas situadas na ruta de sendeirismo máis transitada das Fragas do Eume, o Camiño do Encomendeiros, foron obxecto de intervención o pasado ano. Foi neste proceso de reparación cando os técnicos encargados da obra constataron a rotura de dous fíos trenzados nas catenarias e recomendaron o peche provisional da ponte Cal Grande.

Inventario de infraestruturas viarias

A mellora da ponte colgante Cal Grande encádrase no Programa de conservación e mellora de infraestruturas, instalacións e equipamentos incluído no PRUX, dentro do que tamén está en marcha a contratación dun inventario dixitalizado que inclúa todas as infraestruturas viarias presentes no parque natural, tal e como avanzou a delegada territorial. O obxectivo deste documento é o de mellorar a regulación dos accesos ao parque, tránsito de persoas e vehículos a motor, así como as actividades de uso público.

Neste caso, os traballos abranguerán a rede viaria (estradas asfaltadas), pistas forestais, cortalumes e outras infraestruturas de prevención de incendios, infraestruturas eléctricas e a rede de sendeiros localizadas neste espazo natural.

Ampliación da superficie pública

Doutra banda, Martina Aneiros avanzou que a consellería segue a dar pasos na ampliación da superficie pública do parque natural. “Ata o de agora contactouse con dez propietarios directamente e neste días manteranse contactos con outros tanto titulares, aínda que se prevén moitos máis dado que se está a difundir a liña de traballo”, indicou a representante da Xunta.

Así, habilitouse o número de teléfono 626 720 070 ao que se poden dirixir os interesados en poñer á venta os seus terreos. Ademais, os martes e venres, na Casa Forestal de Esteiro (Pontedeume), e os xoves, na Casa Forestal da Capela, en horario de 10.00 a 14.00 horas, atenderáselles presencialmente.

A Xunta de Galicia destinará 1,1 M€ de fondos Next Generation á adquisición de novas parcelas dentro do parque natural no que o 80 % dos terreos son de titularidade privada coa finalidade de incrementar a superficie pública deste bosque atlántico e asegurar a conservación ecolóxica da fraga autóctona.