A Xunta remata as obras de mellora da seguridade peonil na estrada autonómica LU-617 na contorna do cemiterio de Monforte de Lemos
Actuouse nun treito recto, con beirarrúas no seu inicio e no seu final, co obxectivo de mellorar a seguridade da estrada mediante a separación física do tráfico de vehículos e de peóns, dándolle continuidade ao itinerario peonil existente
As obras, cun investimento de preto de 40.000 €, permitiron ampliar as beirarrúas no acceso o cemiterio no treito de 200 metros, entre os quilómetros 0+600 e 0+800
Habilitáronse pasos de peóns de pavimento táctil, executáronse 5 sumidoiros para a súa conexión á rede de pluviais e realizouse a canalización do alumeado público
A Consellería de Infraestruturas e Mobilidade vén de rematar as obras de mellora da seguridade peonil na estrada autonómica LU-617, na contorna do cemiterio de Monforte de Lemos.
Os traballos, cun orzamento de case 40.000 euros, consistiron na ampliación das beirarrúas no acceso o cemiterio deste municipio lucense, no treito de 200 metros comprendido entre os puntos quilométricos 0+600 e 0+800 da estrada autonómica.
Actuouse nun treito recto, con beirarrúas no seu inicio e no seu final, ampliando as beirarrúas e acadando a mellora da seguridade da estrada mediante a separación física do tráfico de vehículos e do tráfico peonil, dándolle continuidade ao itinerario existente.
Ademais habilitáronse pasos de peóns e colocouse pavimento táctil na execución dos vaos.
Tamén se incluíu na actuación a recollida das augas superficiais, para o que se executaron 5 sumidoiros ao longo da traza, que se conectaron á rede de pluviais existente.
No marco das obras, acometeuse a canalización do alumeado público e dun prisma de 4 tubos para a rede de telecomunicacións, coas súas arquetas correspondentes.
A actuación tamén se completou coa reposición da sinalización horizontal no ámbito de intervención.