A Xunta manterá a partir de mañá, día 1 de xullo, o desconto do 50% nos autobuses autonómicos, no transporte da ría de Vigo e no tren na área de Ferrol.

O Diario Oficial de Galicia publica hoxe a orde que permite continuar con estas bonificacións do 50% no transporte público autonómico, que se aplicará sobre as tarifas dos bonos multiviaxe e das tarxetas de Mobilidade de Galicia, TMG e Xente Nova.

A orde regula o establecemento dunha minoración adicional e temporal nas tarifas bonificadas de aplicación no transporte público interurbano da competencia da Xunta. No seguinte enlace ao DOG pódese ampliar esta información:  https://www.xunta.gal/dog/Publicados/2023/20230630/AnuncioG0533-280623-0003_gl.html

O Consello da Xunta adoptou onte mesmo a decisión de manter a bonificación do 50%, durante seis meses máis, ata finais de ano, os descontos no transporte público autonómico que vén aplicando desde setembro de 2022.

Coa tramitación e publicación da orde hoxe no Diario Oficial de Galicia, o Executivo autonómico anticipouse para garantir que as bonificacións aos usuarios do transporte público autonómico tiveran continuidade, sen interrupción, xa desde o mesmo día 1 de xullo, pese a que non foi ata só hai tres días, o 27 de xuño, cando o Goberno de España confirmou que ía manter o desconto estatal para os autobuses interurbanos e urbanos.

A pesar de que a orde publicada no DOG establece como prazo de aplicación dos descontos ata o 31 de xullo, xa prevé a ampliación do período no que se aplicará a minoración temporal da tarifa en función do establecido polo Goberno central no Real Decreto Lei para responder ás consecuencias económicas e sociais da guerra de Ucraína aprobado polo Consello de Ministros o pasado día 27: isto é, entre o 1 de xullo e ata o 31 de decembro.  

A bonificación do 50% no transporte público autonómico inclúe, ademais do autobús interurbano, o transporte de ría e o tren na área de Ferrol, tamén os servizos de transporte urbano de Ferrol e Pontevedra, cidades onde este transporte se presta a través das concesións autonómicas.

A Xunta vén aplicando desde o pasado 1 de setembro de 2022 a máxima bonificación no transporte público de titularidade autonómica, incrementando nun 20% a axuda estatal que o Goberno de España fixou nun 30%.

Os descontos do 50% aplicados desde a Xunta nos buses autonómicos, no transporte da ría de Vigo e no tren na área de Ferrol, levan xa bonificados case 14 millóns de viaxes, é supón que case o 78 % das viaxes en transporte público de competencia da Xunta recibiran descontos, grazas ao pagamento coas tarxetas de mobilidade de Galicia TMG e TMG Xente nova.

As bonificacións activas impulsaron o uso do transporte público no conxunto de Galicia, que gañou un 28 % máis de viaxeiros entre setembro de 2022 e o pasado mes de maio fronte ao mesmo período do curso anterior. Esta recuperación da demanda aproxima o volume total de persoas usuarias ás cifras previas á pandemia da COVID-19, aínda que continúa un 13 % por debaixo.

A aplicación das bonificacións activas no sistema de transporte público de Galicia supuxo un investimento público que superou os 23 millóns de euros de setembro de 2022 a maio. Do total, 21,3 millóns de euros corresponden aos descontos por pagamento coas tarxetas TMG e TMG Xente Nova e 1,7 millóns de euros á aplicación da rebaixa nos bonos mensuais do autobús.

A Xunta anticipou durante este período cada 15 días as compensacións ás empresas concesionarias pola aplicación directa do desconto adicional do 50 % aos usuarios, aboando tanto os importes correspondentes á Comunidade Autónoma como as cantidades comprometidas polo Estado.

Con estes incentivos a Xunta continúa a atender e dar resposta ás necesidades reais dos cidadáns en materia de mobilidade, mantendo a aposta polo transporte público, destinando 90 millóns de euros no 2023 para o financiamento do autobús interurbano, onde os menores de 21 anos viaxan gratis.