A Xunta avanza na tramitación da planta de metanol verde promovida por Forestal del Atlántico coa publicación hoxe, no Diario Oficial de Galicia (DOG), do anuncio polo que se somete a información pública esta iniciativa. Desde mañá, ábrese un prazo de 30 días hábiles para o exame da documentación e a posible presentación de alegacións ou observacións. 

A iniciativa, declarada Proxecto Industrial Estratéxico polo Consello da Xunta o pasado mes de outubro, conta cun investimento de ao redor de 180 millóns de euros e contribuirá á descarbonización do sector industrial galego. O obxectivo principal do proxecto é a fabricación de metanol verde a partir de dióxido de carbono capturado nas actuais instalacións da empresa, e de hidróxeno producido por electrólise da auga utilizando enerxía eléctrica de orixe renovable. Obterase tamén no proceso osíxeno que se licuará e almacenará para a súa comercialización. A produción que se alcance permitirá cubrir a demanda enerxética da propia compañía e destinar parte para a súa venda directa como materia prima de cara á fabricación de biocombustibles.