A Xunta publica hoxe no DOG o cambio de titularidade a prol do concello de Muxía de catro treitos antigos da estrada AC-440
Transfírense os tramos antigos da vía que comunica Berdoias e Muxía, ao seu paso polos núcleos de Suxo e de Moraime e na contorna do cemiterio
O cambio responde á solicitude do Concello e favorece a mellora da seguridade viaria en varias estradas locais
A entidade local asume a titularidade destes treitos de vía e a responsabilidade da súa conservación e mantemento
Santiago de Compostela, 20 de xuño de 2023 A Xunta publica hoxe no Diario Oficial de Galicia (DOG) o decreto da transferencia a prol do Concello de Muxía de catro treitos antigos da estrada autonómica AC-440, xunto coa súa franxa de dominio público viario, nos núcleos de Suxo e de Moraime e na contorna do cemiterio.
Trátase de dous tramos antigos na marxe dereita da AC-440. Un primeiro treito localizado no lugar de Suxo, de 92 metros de lonxitude, entre os puntos quilométricos 4+780 e 4+880, xunto cos 1.348 m² da franxa de dominio público; e un segundo treito de 123 metros na contorna do cemiterio, do quilómetro 5+040 ao 5+130, así como os 1.499 m2 de dominio público asociado.
Ademais, recóllese o cambio de titularidade de dous treitos antigos da marxe esquerda desta estrada na parroquia de San Xulián de Moraime. En concreto se transfire o treito de 273 metros de lonxitude, entre os puntos quilométricos 11+180 e 11+390, xunto co seu dominio público asociado de 3.338 m²; e un segundo treito de 404 metros de lonxitude e a franxa de 4.853 m² de dominio público asociado no tramo comprendido entre o quilómetro 11+820 e 12+240.
No seguinte enlace ao DOG pódese ampliar a información relativa a esta transferencia, aprobada na reunión do Consello da Xunta do pasado 8 de xuño: https://www.xunta.gal/dog/Publicados/2023/20230620/AnuncioG0533-120623-0001_gl.html
A cesión destes tramos antigos desta estrada autonómica que comunica Berdoias e Muxía atende á solicitude do Concello coruñés e favorece as actuacións de mellora da seguridade viaria en varias estradas locais.
A transferencia tramítase de acordo co previsto na Lei 8/2013, do 28 de xuño, de estradas de Galicia, que establece a súa aprobación por decreto da Xunta, a proposta da Consellería de Infraestruturas e Mobilidade, competente en materia de estradas, e logo do acordo entre as administracións implicadas.
Coa publicación hoxe deste decreto, o Concello de Muxía terá a competencia para actuar nestes treitos da vía e asume a responsabilidade da súa conservación e mantemento.
