O director xeral de Emerxencias e Interior, Santiago Villanueva, visitou hoxe o Posto de Mando Avanzado (PMA) habilitado no Monte do Gozo desde o que se visualizará todo o recinto e accesos ao mesmo e se coordinará o dispositivo de seguridade previsto nos tres días de celebración do festival O Son do Camiño.

Desde hoxe ata o sábado 164 axentes das forzas e corpos de seguridade -entre eles unha trintena de membros da Policía Autonómica, xunto con Policía Nacional, Garda Civil de tráfico e Policía Local de Santiago- traballarán cada día neste evento de relevancia internacional, ademais de medio cento de voluntarios de Protección Civil, bombeiros de Santiago, servizos sanitarios, medios da Axencia Galega de Emerxencias (Axega) e persoal de seguridade privada. En total, máis de 500 efectivos.

Responsables de todos estes servizos integraranse no Posto de Mando Avanzado para coordinar os fluxos de entrada e o cumprimento das medidas seguridade no interior e exterior do evento co obxectivo de previr aglomeracións e actuar ante emerxencias sanitarias ou doutra índole que se poidan producir.

Santiago Villanueva puxo en valor a importancia da coordinación entre todos os medios despregados que forman parte dos operativos habituais de eventos deste tipo. Deste xeito, preténdese que o dispositivo se desenvolva con todas as garantías tanto no propio evento como na incidencia que ten na cidade de Santiago de Compostela ante o fluxo de persoas e vehículos que se vai producir.

A cuarta edición de O Son do Camiño reunirá desde esta tarde ata o sábado máis de 40 artistas nacionais e internacionais de primeiro nivel e coa previsión da asistencia durante as tres xornadas de 120.000 persoas procedentes duns 35 países.