Galicia pecha o primeiro trimestre cunha ratio débeda/PIB do 17,7%
A ratio débeda/PIB de Galicia é tres décimas superior á do primeiro trimestre do ano 2022 debido a que a Xunta acelerou neste primeiros meses a execución do seu programa de endebedamento
Este incremento é transitorio e corrixirase nos vindeiros trimestres
O obxectivo é aproveitar a estabilidade que ofrecían os mercados financeiros nese período
A previsión é que a ratio débeda/PIB continúe a senda de descenso iniciada no 2021 e se sitúe por debaixo do 17% ao peche de 2023
Galicia pechou o primeiro trimestre do ano cunha ratio débeda/PIB do 17,7% segundo o Protocolo de Déficit Excesivo (PDE) correspondentes ao primeiro trimestre do ano publicados hoxe polo Banco de España.
Esta ratio é tres décimas superior á do primeiro trimestre do ano 2022 (17,4%), debido a que a Xunta acelerou nos primeiros meses do ano a execución do seu programa de endebedamento, e executou o 75% do importe de endebedamento autorizado, co obxectivo de aproveitar a estabilidade que ofrecían os mercados financeiros nese período. Este aumento é transitorio e corrixirase nos vindeiros meses.
As operacións de endebedamento formalizadas no primeiro trimestre tiveron por finalidade o refinanciamento dos vencementos ordinarios do exercicio polo que, ao final do ano, non suporán incremento do endebedamento neto.
A previsión é que de cara ao final do exercicio, a ratio débeda/PIB de Galicia continúe a senda de descenso iniciada en 2021 e se sitúe por debaixo do 17% ao peche de 2023.
Volume de débeda
Hai que lembrar que o Banco de España ratifica ademais que Galicia é a comunidade autónoma con menor aumento de volume de débeda desde o ano 2008, exercicio no que comezou a tendencia ascendente na evolución do endebedamento no conxunto das administracións públicas de España, incluídas as comunidades autónomas.