Cenlle (Ourense), 12 de xuño de 2023 A directora xeral de Xuventude, Participación e Voluntariado, Cristina Pichel, visitou hoxe as instalacións do albergue turístico de Laias, que o vindeiro mes de xullo acollerá un dos minicampamentos do programa ‘Coñece Galicia’. Na visita tamén participou o delegado territorial da Xunta de Galicia en Ourense, Gabriel Alén, e o alcalde do concello, José Manuel Rodríguez.

Nestas instalacións hospedaranse os nenos que participen na proposta ‘Ecoverán termal en Laias’, con tres quendas de cinco días de duración e de 18 prazas cada unha que se celebrarán do 10 ao 14 de xullo; do 17 ao 21 de xullo e do 24 ao 28 de xullo (de luns a venres). As actividades deste minicampamento centraranse nos deportes náuticos no encoro de Castrelo de Miño, aínda que tamén haberá visitas culturais pola contorna, unha ruta ambiental no Parque Nacional Peneda-Géres, outro percorrido en tren turístico polo río Miño en Ourense e baños nas Termas de Outariz.

Desde hoxe está aberto o prazo para que as familias soliciten praza neste e nos outros once minicampamentos que se ofertan en ‘Coñece Galicia’, e que están dirixidos a nenas e nenos con idades entre os 10 e os 14 anos. Pódeno facer a través do formulario que está habilitado na páxina web de Xuventude. O prazo de solicitude permanecerá aberto ata cinco días antes da celebración do minicampemento ou ata esgotar prazas. A adxudicación de prazas será por orde de inscrición.

Un total de 600 prazas en 12 establecementos turísticos

A edición deste ano de ‘Coñece Galicia’ pon a disposición das familias un total de 600 prazas nunha ducia de establecementos hoteleiros da nosa Comunidade. Este que terá lugar no albergue turístico de Laias e outro que se celebrará no hotel Candor de A Lama (Pontevedra) son as dúas novas incorporacións do programa.

O resto desta proposta de verán está formada polo seguintes minicampamentos. Na provincia da Coruña: Valdoviño Mariño III, con actividades náuticas e sendeirismo; e Descubrindo a Bela Fisterra II, con propostas para o desfrute do medio mariño. Na provincia lucense: A conquista de Foz IV, con actividades de multiaventura e coñecemento do patrimonio natural e cultural; Aventura na Montaña IV, en Piornedo-Cervantes; A descuberta da Pobra do Brollón III, centrado no turismo de natureza e educación ambiental; e Xeocampamento nas montañas do Courel III, en Folgoso do Courel. 

Natureza, deportes náuticos e cultura

Así mesmo, a provincia de Ourense acollerá os minicampamentos Somérxete na natureza III, que se desenvolverá na Pobra de Trives; Acción no Arnoia III, no que os participantes coñecerán o patrimonio natural de Allariz e a súa contorna; e a novidade xa sinalada no albergue turístico de Laias en Cenlle baixo o nome Ecoverán termal en Laias.