A Consellería do Medio Rural participa na 45ª edición da Feira Internacional Abanca Semana Verde de Galicia mediante a organización de catas e degustacións de produtos galegos de calidade diferenciada, así como apoiando diferentes concursos e certames de gando, especialmente de razas autóctonas galegas, entre outras actividades.

Así, na xornada de hoxe están previstas ata cinco catas-degustacións diferentes, organizadas pola Axencia Galega da Calidade Alimentaria e agrupadas baixo a denominación “Experiencias de Calidade”, no marco do Salón de Alimentación do Atlántico (Salimat Abanca), no que participan unha trintena de empresas galegas do sector, baixo o paraugas da Xunta. Trátase das degustacións de queixos galegos con denominación de orixe protexida (DOP), das indicacións xeográficas protexidas (IXP) Ternera Gallega e Vaca e Boi de Galicia, dos produtos ecolóxicos certificados polo Consello Regulador da Agricultura Ecolóxica de Galicia (Craega), de viños da denominación de orixe Ribeira Sacra e da IXP Pan Galego.

Ademais, a Consellería do Medio Rural apoia, no marco desta Feira internacional, a celebración de diferentes certames de gando, especialmente de razas autóctonas galegas. Entre estes eventos tivo lugar hoxe a exposición de bois de diferentes razas autóctonas de Galicia e Portugal, así coma os concursos morfolóxicos das razas autóctonas galegas en perigo de extinción, entre outros actos.

Na xornada de mañá, o director xeral de Gandaría, Agricultura e Industrias Agroalimentarias, José Balseiros, participará, xunto co director da Axencia para a Modernización Tecnolóxica de Galicia, Julián Cerviño, na inauguración da xornada de presentación da ferramenta informática “Sistemas de Xestión de Explotacións Agrarias (AGRO 4.0) – Cadernos de Explotación”. Trátase dun sistema relacionado co caderno dixital recollido na nova Política Agraria Común (PAC) e incluído na devandita Plataforma AGRO 4.0, unha iniciativa financiada polo Fondo Europeo de Desenvolvemento Rexional (Programa Operativo Feder Galicia 2014-2020). Este instrumento ofrece tamén outras ferramentas, caso do observatorio de parcelas, e senta as bases para a súa aplicación noutros eidos como a gandaría, o vitícola ou o desenvolvemento rural.