As mulleres afectadas en Galicia por situacións de explotación sexual, na súa condición de vítimas de violencia de xénero, xa poden acceder ás axudas mensuais de ata 800 euros que a Xunta de Galicia lles concede para que poidan avanzar na súa independencia económica e recuperación.

O Diario Oficial de Galicia faise eco hoxe da actualización da convocatoria destas axudas, que chega tras ter regulado o Goberno autonómico a remates do ano pasado o recoñecemento das vítimas de explotación sexual como vítimas da violencia de xénero, e coa que se lles dá acceso, como tales, aos apoios e á asistencia integral necesarias.

A efectos legais, a Comunidade galega considera vítimas de explotación sexual ás mulleres “que realizan o exercicio da prostitución, incluídos os actos pornográficos ou a produción de material pornográfico, con obtención de lucro por parte dunha terceira persoa, ben física ou xurídica, cando a vítima se atope nunha situación de vulnerabilidade persoal ou económica ou se lle impoñan condicións gravosas, desproporcionadas ou abusivas”.

A Xunta está a destinar 5,6 millóns de euros de fondos autonómicos -cifra ampliable en función das necesidades- para facer fronte durante 2023 e 2024 a estes pagamentos periódicos cos que segue a apoiar a independencia económica das vítimas.

As axudas periódicas constitúen unha das principais ferramentas coas que o Goberno galego presta apoio ás vítimas da violencia de xénero. Galicia segue a ser comunidade referente neste senso por ser a única que ofrece estas achegas.  

As axudas teñen o prazo aberto de xeito permanente, co que poden solicitarse polas interesadas en calquera momento do ano.

A convocatoria diríxese a mulleres maiores de idade ou emancipadas que sexan vítimas de violencia de xénero nunha relación de convivencia e de dependencia económica do seu agresor. Tamén para as afectadas por situacións de trata con fins de explotación sexual e/ou vítimas de explotación sexual -como se recolle na publicación de hoxe no DOG- que dependan da persoa que exercese sobre elas dominación e/ou explotación, e para as damnificadas pola violencia vicaria.

Como requisito, a convivencia co agresor ten que ter rematado nos 12 meses anteriores á data de presentación da solicitude. Ademais de estar empadroadas e ter residencia efectiva na Comunidade -ou permiso de residencia, no caso das mulleres estranxeiras- deberán acreditar, por outra banda, ingresos mensuais iguais ou inferiores ao dobre do IPREM vixente e non ter percibido esta axuda con anterioridade.

A achega consiste nun pagamento mensual directo para a beneficiaria que se concederá por un máximo de 12 mensualidades. Esta cantidade pode oscilar entre os 200 euros e os 800, contía que varía en función dos ingresos da perceptora, das fillas ou fillos menores (ou menores en acollida) e doutras circunstancias como as condicións de discapacidade.

Con esta modificación, o Goberno galego dá un paso máis no recoñecemento das mulleres sometidas a explotación sexual como vítimas da violencia de xénero, co obxecto de garantirlles os apoios e acompañamento que precisan para saír desa situación.