Santiago de Compostela, 31 de maio de 2023 A Xunta acaba de actualizar a formación básica en primeiros auxilios de todo o persoal adscrito ao Parque Nacional marítimo-terrestre das Illas Atlánticas de Galicia, desde axentes medioambientais, técnicos e vixiantes ata equipo directivo, tripulantes e administrativos, entre outros.

Deste xeito, durante as últimas dúas semanas de maio instrutores oficiais de Soporte Vital da Sociedade Española de Medicina Familiar e Comunitaria (SEMFYC) e persoal docente de emerxencias médicas impartiron coñecementos esenciais de soporte vital básico e de capacitación para a utilización de desfibriladores externos semiautomáticos ás 48 persoas que traballan actualmente no Parque Nacional, tanto persoal que desenvolve o seu labor en Cíes, Ons, Sálvora e Cortegada como o adscrito ao edificio Cambón de Vigo, sede central do organismo.

Entre os obxectivos que se busca acadar con esta formación cómpre subliñar o inicio da cadea de supervivencia, incluíndo unha adecuada interacción co sistema de emerxencias; recoñecer de forma rápida unha parada cardiorrespiratoria; aplicar as técnicas de permeabilización da vía aérea; realizar unha reanimación cardiopulmonar de alta calidade; e utilizar o desfibrilador dunha maneira eficaz e segura.

A tal fin, os participantes realizaron prácticas para colocar un corpo en posición lateral de seguridade, a única eficaz en persoas inconscientes, non traumáticas e que respiran espontaneamente, para evitar a aspiración de vómitos e a obstrución da vía aérea; a manobra de Heimlich, combinada con golpes nas costas, en adultos e en nenos; a reanimación cardio-pulmonar; e o manexo do desfibrilador semiautomático, dispositivo dispoñible en cada unha das catro illas e tamén no Centro de visitantes de Vigo.

Tras completar o curso, todos os alumnos recibiron un diploma acreditativo emitido polo Comité Autonómico de Reanimación Cardiopulmonar (RCP) e avalado pola SEMFYC.