Santiago de Compostela, 16 de maio de 2023 A Xunta, a través da Axencia Galega da Calidade Alimentaria, dependente da Consellería do Medio Rural, porá en valor mañá a Indicación Xeográfica Protexida (IXP) Pan Galego na novena xornada Día do Pequebasket 2023, organizada pola escola de basket Xiria de Carballo.

Trátase dunha xornada para poñer en valor o deporte entre os máis pequenos, especialmente aqueles que xogan ao baloncesto. Participarán no Día do Pequebasket arredor duns 45 equipos con 550 xogadores de entre 5 e 8 anos. Xogarán 120 partidos nas sete canchas que hai dispoñibles para esta actividade.

A IXP Pan Galego participará mediante a entrega de 600 moletes, acompañados dun texto informativo sobre a elaboración de xeito tradicional baixo a norma da Indicación Xeográfica Protexida aos participantes e a parte do público asistente. Prestaráselle especial atención aos máis cativos, para que aprendan dende pequenos a calidade diferencial deste produto.

IXP Pan Galego

Cabe sinalar que existen catro tipos de pans autorizados baixo esta IXP: fogaza, bola, rosca e barra. Este tipo de pan elabórase cun mínimo do 25 % de fariña de trigo Caaveiro, Callobre ou outros trigos autóctonos de Galicia e masa nai.

Así, o Pan Galego precisa de longos amasados, non leva nin conservantes nin aditivos e elabórase con masa nai de cultivo propio. As porcentaxes de hidratación que esixe este pan son elevadas e, ademais, conta con varios procesos de fermentación: a primeira en bloque unha vez que remata o amasado; a segunda faise por peza, unha vez dividida a masa; e a terceira nas bandexas de cocción antes de introducirse nos fornos de soleira refractaria, que dan lugar á formación dunha codia crocante e con acabado dourado.