Os profesionais do Sergas escollen a nova Mesa Sectorial de Sanidade, que estará conformada polos sindicatos CIG, CSIF, CCOO e UGT
Escolléronse 299 delegados, e o censo de electores medrou en máis 3.700 profesionais respecto ao proceso electoral anterior, ata acadar os 43.150
A participación no proceso electoral foi do 55,60%, ascendendo o número de votantes até os 23.993
As organizacións sindicais CIG, CSIF, CCOO e UGT, formarán parte da Mesa Sectorial do persoal estatutario do Servizo Galego de Saúde; con 5, 4, 3 e 3 representantes, respectivamente
Profesionais de todas as categoría do Servizo Galego de Saúde exerceron o seu dereito ao voto nas eleccións sindicais celebradas onte, día 11 de maio, para elixir aos seus representantes nas xuntas de persoal. Así, o resultado do procedemento deu lugar á nova Mesa sectorial de Sanidade, que estará conformada polos sindicatos CIG, CSIF, CCOO e UGT, e que contarán con 5, 4, 3 e 3 representantes, respectivamente. Así, o sindicato SATSE quedou en quinto lugar.
O persoal do Sergas escolleu un total de 299 delegados, incrementándose esta cifra en 12, en relación coas eleccións celebradas no ano 2019 (287). Así, o proceso contou cun censo de electores de 43.150 profesionais, o que supón un incremento de máis de 3.700 profesionais respecto das elección sindicais celebradas en 2019 (39.445 profesionais).
A participación no proceso electoral foi do 55,60%, unha porcentaxe moi similar á do ano 2019 (56,48%). Ademais, o número de votantes ascendeu até os 23.993, fronte aos 22.277 do ano 2019.
As candidaturas presentadas nas 11 unidades electorais foron: CIG, CCOO, CSIF, SATSE, UGT e USAE. Así mesmo, tamén se presentaron en determinadas unidades: OMEGA, SESNNLLE, CUT, COBAS e PROSAGAP.
Resultados electorais
No seguinte cadro reflíctese o número de delegados/as de persoal obtido polas candidaturas presentadas no conxunto do Servizo Galego de Saúde:
Sindicatos | Representantes |
CIG | 68 |
CSIF | 58 |
CC.OO. | 49 |
UGT | 38 |
SATSE | 29 |
USAE | 27 |
OMEGA | 22 |
PROSAGAP | 5 |
COBAS | 3 |
No anexo final, engádense os resultados por unidades electorais e áreas sanitarias.
Composición da Mesa sectorial
As organizacións sindicais CIG, CSIF, CCOO e UGT, por ter obtido cando menos o 10% dos/as delegados/as de persoal no conxunto das unidades electorais, formarán parte da Mesa Sectorial de persoal estatutario do Servizo Galego de Saúde, órgano no que os representantes dos/as traballadores/as que resulten elixidos, negociarán coa Administración as condicións de traballo e retributivas do persoal do organismo nos próximos catro anos.
Os 15 representantes das organizacións sindicais que conforman a nova Mesa Sectorial quedan repartidos do seguinte xeito: 5 CIG, 4 CSIF, 3 CCOO e 3 UGT.
Non obstante, a dita distribución é provisional, pois deriva dos/as delegados/as elixidos/as nas 11 circunscricións electorais tras o escrutinio en cada unha delas, e, polo tanto, está suxeita a eventuais reclamacións.
A Administración quere transmitir os seus parabéns, non xa a aquelas organizacións sindicais cuxos resultados cumprisen ou mellorasen as súas expectativas, senón a todas as participantes, en tanto que a intervención nun proceso destas características representa, de seu, a consolidación do principio democrático; e agarda que a nova composición da mesa sectorial contribúa a manter o nivel de colaboración e negociación dos últimos catro anos, que tivo como resultado acordos tan relevantes como o de carreira profesional, ou o recente Acordo de 20 de abril de 2023 de melloras das condicións de traballo e retributivas.
ANEXO REPRESENTANTES SINDICAIS POR ÁREAS
ÁREA CORUÑA E CEE | |
CCOO | 5 |
CIG | 11 |
CSIF | 7 |
SATSE | 2 |
UGT | 3 |
USAE | 5 |
OMEGA | 4 |
TOTAL | 37 |
ÁREA DE SANTIAGO E BARBANZA | |
CCOO | 10 |
CIG | 7 |
CSIF | 3 |
SATSE | 2 |
UGT | 8 |
USAE | 2 |
OMEGA | 3 |
TOTAL | 35 |
ÁREA DE FERROL | |
CCOO | 6 |
CIG | 7 |
CSIF | 4 |
SATSE | 2 |
UGT | 4 |
USAE | 3 |
OMEGA | 1 |
TOTAL | 27 |
ÁREA DE LUGO, A MARIÑA E MONFORTE | |
CCOO | 7 |
CIG | 19 |
CSIF | 21 |
SATSE | 7 |
UGT | 8 |
USAE | 8 |
OMEGA | 3 |
TOTAL | 73 |
ÁREA DE OURENSE, VERÍN E O BARCO | |
CCOO | 6 |
CIG | 9 |
CSIF | 11 |
SATSE | 8 |
UGT | 7 |
USAE | 5 |
OMEGA | 2 |
TOTAL | 48 |
ÁREA DE PONTEVEDRA E O SALNÉS | |
CCOO | 8 |
CIG | 8 |
CSIF | 8 |
SATSE | 4 |
UGT | 6 |
USAE | 1 |
OMEGA | 5 |
PROSAGAP | 1 |
CO.BAS | 3 |
TOTAL | 44 |
ÁREA DE VIGO | |
CCOO | 7 |
CIG | 7 |
CSIF | 4 |
SATSE | 4 |
UGT | 2 |
USAE | 3 |
OMEGA | 4 |
PROSAGAP | 4 |
TOTAL | 35 |
Desenvolvemento do proceso electoral
O procedemento iniciouse o pasado día 14 de novembro de 2022, coa promoción das eleccións e aprobación do calendario electoral polas organizacións sindicais, que culmina co acto da votación. Así, o seu seguimento instrumentouse a través da Comisión Central Consultiva, e dos grupos de traballo das áreas sanitarias creados ata a constitución das mesas electorais.
Para o seu desenvolvemento, constituíronse, sen incidencias destacables, 85 mesas electorais repartidas nas 11 unidades electorais (A Coruña e Cee, Santiago e Barbanza, Ferrol, Lugo, A Mariña, Monforte, Ourense e Verín, O Barco, Pontevedra, O Salnés, e Vigo), e distribuídas tanto en centros de saúde como nos hospitais, cun horario de apertura o día da votación de 8:00 á 23.00 horas, o que favoreceu o exercicio do dereito de sufraxio do persoal de todas as quendas (mañá, tarde e noite).
As referidas mesas están constituídas por 3 membros, o que implica que 255 profesionais do Servizo Galego de Saúde colaboran no proceso, ademais dos interventores e apoderados nomeados polas candidaturas, xunto cos representantes da Administración, coordinadores das xerencias das áreas sanitarias e persoal de apoio. A Administración facilitou, ademais de medios humanos, todos os medios materiais necesarios para o normal desenvolvemento do proceso (censos, urnas, papeletas...).