O conselleiro do Medio Rural, José González, valorou de xeito positivo que o Goberno central aprobase varias das medidas que viña reclamando Galicia de xeito reiterado a prol do sector primario, ao tempo que agarda que unha vez se concreten a nosa comunidade non se vexa discriminada con respecto a outras. Nese senso, sinala que estas medidas son necesarias nun contexto de continuas subas dos custos de produción, máis aló da situación de seca que se está a vivir en España.

Do mesmo xeito, o conselleiro sinalou que é de valorar que, no que se refire ao vacún de carne, se asumise tamén a postura da Xunta de Galicia de incrementar as axudas por vaca nutriz. Neste sentido, cómpre lembrar que o ano pasado as axudas directas que aprobou o Estado tiñan un importe por vaca -no que se refire á carne- moi inferior ao das axudas extraordinarias aprobadas pola Xunta neste ano, que supuxeron 14 millóns de euros para os nosos gandeiros de vacún de carne e que se están cobrando estes días, explicou. Porén, o titular do Medio Rural considerou insuficiente os 40 euros que se prevén por vaca nutriz do leite.

Nesa liña, as medidas aprobadas hoxe demostran, tal e como indicou o conselleiro, que nestes momentos quen se tiña que facer responsable a nivel nacional e tiña capacidade orzamentaria e competencias para facer o esforzo no que se refire ás axudas directas era o Estado. Sobre todo, tendo en conta a situación xeral de incremento nos custos de produción e da seca.

Así mesmo, o conselleiro do Medio Rural destacou tamén outra medida moi demandada por Galicia e o resto de comunidades autónomas da Cornixa cantábrica xunto coas nosas organizacións agrarias, que é a moratoria na aplicación do caderno dixital. 

En definitiva, José González sinalou que, dende a Xunta, están satisfeitos pola acollida das reclamacións e demandas feitas ao Goberno central, reiterando que agora cómpre ver como se traducen esas achegas para Galicia.