O director da Axencia Galega de Infraestruturas, Francisco Menéndez, destacou hoxe no Parlamento que a Xunta ten blindado un orzamento de 21 M€ para continuar desenvolvendo actuacións de eliminación de tramos de concentración de accidentes nos vindeiros anos.

En resposta a unha pregunta na Comisión 2ª da Cámara autonómica, Francisco Menéndez referiu o traballo para reforzar a seguridade viaria nas estradas de titularidade da Xunta.

Destacou o impulso da Estratexia da eliminación de treitos de concentración de accidentes, atendendo a un mandato parlamentario, xa que en outubro de 2017 o Pleno do Parlamento galego aprobou un acordo no que se instaba á Xunta a protexer aos usuarios máis vulnerables das estradas e a mellorar a seguridade en todos os treitos de concentración de accidentes nas vías autonómicas; un acordo que tamén instaba ao Goberno de España a realizar o propio nas estradas de competencia estatal.

Francisco Menéndez referiu que as obras levadas a cabo no marco desta Estratexia de supresión de concentración de accidentes, cun investimento de 16,8 millóns de euros, permitiron reducir un 60% a sinistralidade nestes puntos.

Dada a eficiencia das intervencións, detallou que os Orzamentos da Xunta para 2023 concretan a planificación de dúas partidas, unha coas últimas actuacións da Estratexia de eliminación treitos de concentración de accidentes, e outra con continuidade nos vindeiros anos con fondos europeos, e que permitirá desenvolver unha nova estratexia e a supresión de obstáculos nas marxes para conformar as “estradas que perdoan”. Subliñou que Galicia é a única Comunidade Autónoma que conseguiu que os fondos europeos FEDER financien este tipo de actuacións.

O director da Axencia Galega de Infraestruturas lembrou que, ata o agora, todo o financiamento do programa, que ascende a 16,8 M€, foi financiado integramente con fondos propios da Xunta.

Indicou que as actuacións recollidas cando se puxo en marcha esta estratexia están a piques de culminar co remate dos últimos traballos en vías autonómicas en Cangas, Moaña, Ponteareas e Sanxenxo. Así, as intervencións en todos os treitos identificados como de concentración de accidentes supuxeron o acondicionamento de 119 interseccións, a construción de 24 novas rotondas ou a mellora de 138 pasos de peóns para unha mellor accesibilidade e seguridade.

Plan de Seguridade Viaria 2022-2025

Francisco Menéndez explicou que estas actuacións están enmarcadas no Plan de Seguridade Viaria 2022-2025, unha ferramenta global deseñada con “visión cero”, é dicir, co obxectivo de reducir ao mínimo posible as vítimas en accidentes e a meta final de cero vítimas.

Xunto ao enfoque de “visión cero”, o Plan de Seguridade Viaria 2022-2025 tamén recolle o concepto de “sistema seguro”, baseado en que os falecidos e feridos en accidentes de tráfico non son unha consecuencia inevitable da mobilidade polo que, aínda que se sigan producindo sinistros nas estradas, o obxectivo é evitar as consecuencias máis graves.