A Xunta completará este mes a dotación de equipamento tecnolóxico innovador en máis de 80 aulas adheridas ao Plan de reforma da rede CeMIT
En total distribuiranse máis de 1.300 dispositivos entre impresoras 3D, kits de robótica, drons, gafas de realidade virtual e kits de placas de comunicación e programación
O próximo fito do Plan será a substitución dos equipos de sobremesa actuais por novos equipos All-In-One, a entrega de elementos adaptados a persoas con capacidades diversas, así como tabletas, libros electrónicos e dispositivos audiovisuais
A dotación de equipamento vai acompañada dun plan de formación de máis de 100 horas destinado ao persoal dinamizador das aulas
Ademais, lanzarase unha convocatoria de premios para incentivar o uso deste equipamento e recoñecer a labor dos axentes TIC dos centros CeMIT
A Axencia para a Modernización Tecnolóxica de Galicia completará o vindeiro 14 de abril a entrega do novo material disruptivo que está a ser distribuído nas 83 aulas e 82 entidades locais adheridas actualmente ao Plan de Reforma e Ampliación da Rede de aulas CeMIT (2022-2025). O obxectivo deste Plan é mellorar os servizos de capacitación e formación dixital dos centros CeMIT para adaptarse ás novas demandas da cidadanía.
Novos fitos do Plan
O responsable autonómico tamén avanzou os seguintes fitos do Plan como a substitución dos equipos actuais de sobremesa por máis de 1.300 equipos All-in-One, ademais da adquisición de 20 unidades de dispositivos adaptados a persoas con capacidades diversas, 880 tablets, 840 libros electrónicos e 84 complementos audiovisuais.
Con esta liña de traballo, a Axencia para a Modernización Tecnolóxica de Galicia busca ampliar e mellorar a oferta formativa da Rede CeMIT, que conta con preto de 110.000 usuarios e supera xa as 511.200 horas de formación planificadas desde o seus inicios, e a mellora da adquisición de competencias dixitais por parte da cidadanía.
Estratexia Dixital de Galicia
Esta iniciativa enmárcase na Estratexia Galicia Dixital 2030, elaborada pola Axencia autonómica, concretamente no segundo eixo, Sociedade Dixital e inclusiva, que busca dotar ao conxunto da cidadanía da capacitación dixital necesaria para desenvolverse plenamente con confianza e seguridade no contexto dixital e non deixar a ninguén atrás.