Santiago de Compostela, 30 de marzo de 2023 A Xunta estenderá ás residencias de maiores públicas un sistema de rehabilitación e fisioterapia por realidade virtual que permite que os maiores fagan terapias a través desta tecnoloxía. Trátase dunha ferramenta que xa se probou de maneira experimental con gran éxito no centro Torrente Ballester (A Coruña), na residencia de Caranza (Ferrol) e no CRAPD de Vigo; e que favorece a recuperación dos maiores ao tempo que se divirten e fan exercicio físico. Así mesmo, adquiriranse preto dun centenar de tabletas electrónicas coas que os usuarios realizarán probas de estimulación cognitiva por medio de diversos xogos, como crebacabezas e outros pasatempos. 

O Goberno galego destinará arredor de 500.000 euros en dotar ás residencias destes dous instrumentos, que acaban de saír a licitación, e que mellorarán a atención aos usuarios e contribuirán a detectar, previr e actuar ante situacións de deterioro físico e cognitivo.

Unha vez que se complete a contratación destes dous lotes, a previsión é que estean implantados nas residencias este verán. 

Novo modelo de coidados

Esta medida inclúese dentro do novo modelo de coidados de Galicia, que ten como piares fundamentais o aproveitamento das vantaxes tecnolóxicas, o fomento da coordinación sociosanitaria, a creación de espazos máis acolledores e a humanización na atención.