Galicia rexistrou un déficit do 0,4 % en 2022, dúas décimas menos do previsto
Rueda salienta que este control do déficit permitiu un endebedamento de 210 M€ inferior ao estimado no orzamento
Destaca que a Administración galega situouse como a segunda comunidade autónoma que pagou con máis axilidade os seus provedores, 10 días antes que a media
Lembra que a Comunidade galega recuperou xa en 2022 o PIB prepandemia e pon en valor que se crearon case 22.000 empregos
O presidente da Xunta, Alfonso Rueda, enxalzou hoxe o feito de que Galicia mellorou o déficit marcado no orzamento, xa que apuntou que se situou nun 0,4 % do Produto Interior Bruto, “o que supón dúas décimas menos do límite previsto”. Ademais, subliñou que a comunidade rexistrou unha ratio débeda/PIB do 17,2 %, “tres décimas por debaixo do previsto, o que supuxo aforrar 210 millóns de euros, en canto a capacidade de endebedamento”.
Recuperación PIB prepandemia
Rueda lembrou que Galicia recuperou no cuarto trimestre de 2022 o nivel do PIB da prepandemia, “con varios trimestres de antelación á media de España, cando hai comunidades que aínda non o teñen recuperado”, contrapuxo. Tamén salientou o feito de que a economía galega medrou un 3,8 % o ano pasado, “dúas décimas por riba do previsto”, remarcou.
Finalmente, en termos de emprego, o presidente da Xunta salientou que no conxunto do ano 2022 creáronse preto de 22.000 postos de traballo equivalentes a tempo completo (PTETC), polo que aumentou un 2,2 % con respecto ao anterior exercicio, o que tamén permitiu superar o número empregos da economía galega antes da pandemia.
Imaxes relacionadas
