A Xunta apoia a posta en marcha da nova Agrupación de Voluntarios de Protección Civil de Dozón
O delegado territorial da Xunta en Pontevedra, Luis López, e o director xeral de Emerxencias e Interior, Santiago Villanueva, entregaron os carnés oficiais identificativos aos once integrantes da entidade nun acto celebrado no consistorio coa presenza do alcalde, Adolfo Campos
A agrupación quedou constituída oficialmente hai seis meses e está a dar os seus primeiros pasos na atención de incidencias e a realización de operativos tras case ano e medio de tramitación administrativa para a súa creación e de formación para os seus membros
“É fundamental que os concellos, e principalmente os rurais como Dozón, conten cunha agrupación cuxo único fin é axudar aos veciños, especialmente nas circunstancias máis difíciles, e por iso teñen a absoluta colaboración da Xunta”, indicaron os representante autonómicos
Dozón, 23 de marzo de 2023 A Xunta de Galicia, a través da Vicepresidencia segunda e Consellería de Presidencia, Xustiza e Deportes, vén de apoiar durante os últimos meses a creación e posta en marcha da nova Agrupación de Voluntarios de Protección Civil de Dozón, que hoxe presentouse en sociedade nun acto celebrado na Casa do Concello.
O delegado territorial da Xunta en Pontevedra, Luis López, e o director xeral de Emerxencias e Interior, Santiago Villanueva, presidiron esta mañá o acto de entrega de carnés oficiais e acreditacións identificativas aos once integrantes desta entidade nun encontro que tivo lugar no consistorio e que tamén contou coa presenza do alcalde castrense, Adolfo Campos, o responsable provincial de Emerxencias, Miguel Ángel Pérez Dubois, e outros representantes municipais.
“Queremos trasladarlles os máximos parabéns a estas once persoas polo seu altruísmo e xenerosidade e por embarcarse nunha actividade que implica moitos sacrificios persoais e familiares, pero que contribúe enormemente a mellorar a sociedade e que sempre reporta a satisfacción de axudar aos demais”, manifestaron os representantes autonómicos, que tamén quixeron agradecer a colaboración e implicación do Concello na posta en funcionamento deste novo servizo.
A agrupación deu os seus primeiros pasos hai 18 meses cunhas xuntanzas organizativas e o establecemento dunha folla de ruta ata a aprobación provisional, en abril do ano pasado, do regulamento da agrupación nun pleno extraordinario. Posteriormente, xa no mes de setembro, a entidade deuse de alta no rexistro oficial e a continuación os seus once integrantes cumprimentaron o Curso Básico de Protección Civil –obrigatorio para ser voluntario– no veciño municipio de Lalín.
Así, a agrupación xa está a dar os seus primeiros pasos, tras case ano e medio de tramitación administrativa e formación do seu persoal, e comeza coa atención de incidencias e a realización de operativos no termo municipal, polo que dende a Xunta de Galicia quixo acelerarse a entrega dos elementos identificativos e a celebración deste encontro para trasladarlles os parabéns e o apoio do Goberno galego.
“É fundamental que os concellos, e principalmente os rurais como Dozón, cunha poboación bastante envellecida e cunha dispersión importante, conten cunha agrupación de Protección Civil, cuxo único fin é axudar aos veciños, especialmente nas circunstancias máis difíciles, e por iso teñen a absoluta colaboración da Xunta, que irá da súa man ao longo dos vindeiros anos para que cada vez dispoñan dos mellores medios para atender aos cidadáns”, concluíron os representantes autonómicos.