A Consellería do Mar vai manter a próxima semana un encontro con representantes dos produtores de mexillón de Galicia co obxectivo de analizar e informar dos avances sobre as propostas de apertura de novas zonas para a extracción de mexilla -semente de mexillón- que unha parte do sector remitiu trala última xuntanza mantida co director xeral de Pesca, Acuicultura e Innovación Tecnolóxica, Antonio Basanta, o pasado 7 de febreiro para abordar o problema da escaseza deste recurso.

Estes contactos -que tamén se veñen mantendo e manterán cos representantes das confrarías de pescadores da comunidade- enmárcanse na liña de diálogo mantida nos últimos meses pola Xunta e prodúcense unha vez analizadas as propostas remitidas por algunhas organizacións do sector do mexillón trala última reunión. Deste xeito, unha vez avaliadas esas suxestións polos técnicos e coas partes implicadas -bateeiros e confrarías- o Executivo galego estaría en disposición de abrir novas zonas para a extracción de mexilla en bancos naturais tras concluír a tramitación pertinente.  

No encontro tamén se abordarán outras cuestións expostas por unha parte do sector e relacionadas cunha maior flexibilidade na operativa diaria co obxectivo de facer fronte, na medida do posible, ás dificultades que están a ter os produtores para obter cría de mexillón.

A Consellería do Mar avanza así na vía do diálogo mantida desde o primeiro momento coa finalidade de que as decisións que se adopten sexan equilibradas cos intereses dos dous sectores implicados -os bateeiros e os percebeiros- garantindo ao mesmo tempo unha explotación sustentable dos recursos.