O delegado territorial da Xunta de Galicia na Coruña, Gonzalo Trenor, e a directora da Axencia Galega de Innovación, Patricia Argerey, presentaron esta mañá, no marco dun encontro organizado en colaboración coa Confederación de Empresarios da Coruña, o mapa de axudas da Administración autonómica á I+D+i, que inclúe 38 instrumentos de apoio e que prevé mobilizar preto de 400 millóns de euros ao longo de 2023, tanto a través destes instrumentos como dos investimentos en infraestruturas do ecosistema galego de innovación.

A directora da Axencia Galega de Innovación destacou que se trata da primeira vez que se presentan conxuntamente todos os apoios públicos á investigación e á innovación da Xunta de Galicia co obxectivo de facilitar o seu acceso aos axentes do sistema galego de innovación, especialmente ás pemes. Este mapa, resultado do traballo da Comisión Interdepartamental de I+D+i da Xunta e estruturado en base ás prioridades da Estratexia de Especialización Intelixente (RIS3) de Galicia, cobre todas as etapas e axentes da I+D+i: desde o emprendemento e a innovación empresarial, ata a contratación de persoal para realizar tarefas de I+D+i, pasando pola proxección exterior e a internacionalización, a colaboración entre axentes e o fortalecemento dos centros tecnolóxicos e de coñecemento.

Pola súa banda, Gonzalo Trenor destacou a importancia destes encontros sectoriais porque “co apoio dos expertos na materia e achegando a experiencia de empresas galegas innovadoras poñemos en evidencia que innovando as nosas pemes poden gañar en competitividade e produtividade”. O representante do Goberno galego apuntou que “confiamos en que todas estas axudas sirvan para seguir impulsando novas iniciativas para afrontar o futuro” e mostrou a súa confianza en que ”o traballo se peche cun saldo positivo e que a información facilitada hoxe sexa útil para emprender novos proxectos duradeiros e frutíferos nas vosas empresas”.

Na xornada tamén se informou de que permanece aberta ata o vindeiro 10 de abril a convocatoria Bonos de Innovación, que conta nesta edición cun orzamento de 750.000 euros, cos que se prevé mobilizar más dun millón, co obxectivo de impulsar os primeiros pasos para innovar nas microempresas e pemes, a través da contratación de servizos externos de axentes innovadores para conseguir un salto cualitativo e cuantitativo na súa actividade de I+D+i a curto prazo.

Próximas xornadas

Esta xornada, que se enmarca no ciclo de Networkings Galicia Empresa organizados pola Vicepresidencia primeira e Consellería de Economía, Industria e Innovación, pecha o ciclo de encontros provinciais centrados na innovación que tiveron lugar en Ourense, Vigo e Lugo. Así mesmo, este xoves arrinca a celebración de xornadas sectoriais centradas na innovación social; o sector primario; a loxística e a enxeñaría; e na minaría, enerxía e construción.