A Xunta publica a declaración como proxecto de interese autonómico a ampliación da industria láctea Casa Grande de Xanceda, en Mesia (A Coruña)
O DOG recolle hoxe a resolución correspondente, co fin de ordenar e planificar novos terreos para instalacións complementarias á actividade gandeira actual e outras superficies para dar soporte ás súas actividades turísticas, culturais e formativas
Mediante este proxecto prevese ampliar as instalacións con 9.701 m² para poñer en marcha unha planta de biogás e tratamento de xurros, entre outros obxectivos
A declaración xustifícase en que as actividades desenvolvidas por Casa Grande de Xanceda son fundamentais para o sector agroalimentario ecolóxico galego
A iniciativa enmárcase na Estratexia de dinamización do sector lácteo, que busca consolidar este eido como estratéxico para o rural de Galicia tendo en conta que achega o 1,5% do PIB da comunidade
O Diario Oficial de Galicia (DOG) publica hoxe a resolución pola que se fai público o acordo do Consello da Xunta polo que se declara como proxecto de interese autonómico a ampliación das instalacións da sociedade Casa Grande de Xanceda, situada no concello coruñés de Mesía. O obxectivo desta iniciativa é ordenar e planificar unha ampliación que ten como fin habilitar terreos para instalacións complementarias á actividade gandeira actual -planta de biogás e tratamento de xurros-, así como outras superficies para dar soporte ás súas actividades turísticas, culturais e de formación.
Xustificación da medida
Esta declaración como proxecto de interese autonómico xustifícase en que as actividades desenvolvidas por Casa Grande de Xanceda son fundamentais para o sector agroalimentario ecolóxico galego. É un modelo de desenvolvemento económico sostible no rural, por combinar un equilibrio entre a ecoindustria e o coidado do medio ambiente e benestar animal, promover a formación e a concienciación ambiental mediante visitas guiadas, ofertar programas de educación escolar continua en toda Galicia e realizar accións solidarias a nivel estatal.
Casa Grande de Xanceda está operativa desde 1968 e conta con certificado ecolóxico desde 2004. Sitúase ademais no centro xeográfico dunha das comarcas con maior tradición leiteira da produción ecolóxica láctea galega, polo que os seus provedores de leite, produtos tecnolóxicos e loxísticos proceden en gran parte de toda a comunidade.
Estratexia de dinamización do lácteo
Esta declaración enmárcase na aplicación da Estratexia de dinamización do sector lácteo galego (2020-2025), que configura este eido como estratéxico para o rural de Galicia, xa que achega o 1,5% do Produto Interior Bruto (PIB) da comunidade.
Esta Estratexia -promovida pola Xunta en colaboración cos axentes do sector- está contribuíndo a consolidar Galicia como referente neste eido, con fitos como a mellora progresiva dos prezos ou o reforzo da posición negociadora dos gandeiros, grazas a ferramentas como a aplicación informática Contaláctea. Nesa liña, traballa en cinco grandes eixos: a produción, a industria, os mercados, a cadea de valor e a formación e innovación.
Ligazón á resolución no DOG: