A Xunta, a través da Axencia Galega da Calidade Alimentaria, dependente da Consellería do Medio Rural, porá en valor a Indicación Xeográfica Protexida (IXP) Pan Galego no partido de baloncesto que se celebra mañá entre o Clube Ourense Baloncesto e o Leyma Coruña, no Pazo de Deportes Paco Paz, na cidade de Ourense.

Na acción participarán tres obradoiros que forman parte da IXP Pan Galego, que subministrarán 2.500 bolas de medio quilo aos asistentes ao encontro, xunto con folletos informativos das características deste produto tradicional. Prestaráselle especial atención aos máis cativos, para que aprendan dende pequenos a calidade diferencial deste produto.

A maiores, convócase un concurso de debuxo entre todos os colexios de infantil e primaria da provincia de Ourense. Nas obras destes nenos e nenas deberá aparecer tanto o logo do Clube Ourense Baloncesto como o da IXP Pan Galego. O gañador ou gañadora recibirá un lote de agasallos promocionais de varias denominacións de orixe e indicacións xeográficas protexidas.

IXP Pan Galego

Cabe sinalar que existen catro tipos de pans autorizados baixo esta IXP: fogaza, bola, rosca e barra. Este tipo de pan elabórase cun mínimo do 25% de fariña de trigo Caaveiro, outros trigos autóctonos de Galicia e masa nai.

Así, o Pan galego precisa de longos amasados, non leva nin conservantes nin aditivos e elabórase con masa nai de cultivo propio. As porcentaxes de hidratación que esixe este pan son elevadas e, ademais, conta con varios procesos de fermentación: a primeira en bloque unha vez que remata o amasado; a segunda faise por peza, unha vez dividida a masa; e a terceira nas bandexas de cocción antes de introducirse nos fornos de soleira refractaria, que dan lugar á formación dunha codia crocante e con acabado dourado.