O presidente da Xunta interveu no acto do nomeamento do político de Petín como fillo predilecto da provincia de Ourense
Rueda pon en valor o papel do expresidente José Quiroga na construción da autonomía de Galicia como a casa común da que hoxe desfruta o pobo galego
Salienta que a homenaxe a Quiroga é un recoñecemento aos persoeiros que traballaron polo autogoberno de Galicia “con poucas ferramentas e moi escasos recursos”
Santiago de Compostela, 9 de febreiro de 2023
O presidente da Xunta, Alfonso Rueda, puxo en valor o papel do expresidente José Quiroga na construción da autonomía de Galicia como a casa común da que hoxe desfruta o pobo galego. O mandatario autonómico asegurouno na súa intervención no acto de nomeamento do político de Petín como fillo predilecto da provincia de Ourense por iniciativa da Deputación provincial.
Rueda enxalzou a talla “física, moral e política” dunha figura que sen esquecer nunca as súas obrigas como médico e como pai de familia foi quen de emprender un camiño cheo de incertezas como foi o da construción do autogoberno galego e a redacción do Estatuto de Autonomía. Asegurou que a homenaxe a Quiroga era tamén un recoñecemento a todos os persoeiros que traballaron polo autogoberno de Galicia “con poucas ferramentas e moi escasos recursos”.
O presidente do Goberno galego loou tamén e carácter construtivo e dialogante daquela xeración de políticos que, nos tempos da Transición e por riba das diferenzas, tiñan o obxectivo común de acadar unha Constitución para España e un Estatuto para Galicia.
Imaxes relacionadas
