Santiago de Compostela, 9 de febreiro de 2023 A Xunta e o Concello de Pazos de Borbén abordaron hoxe os avances na redacción do proxecto construtivo para a execución da rede de saneamento e de depuración no lugar de Cuartos de Borbén.

A directora de Augas de Galicia, Teresa Gutiérrez, e técnicos deste ente autonómico, mantiveron hoxe un encontro de traballo co alcalde de Pazos de Borbén, Andrés Iglesias, co obxectivo de informalo sobre as actuacións necesarias para poder desenvolver a redacción deste proxecto construtivo, e poder así darlle solución á depuración das augas neste lugar da parroquia de Borbén.

Teresa Gutiérrez informou ao rexedor sobre os diferentes trámites administrativos efectuados para acadar a coordinación con outros organismos e administracións afectados, e garantir así a viabilidade administrativa desta actuación no municipio, conforme á solución desenvolvida por Augas de Galicia.

Na xuntanza, o Concello confirmou que está en condicións de poñer á disposición da Xunta os terreos necesarios para executar as obras, manifestando a súa conformidade ao trazado proposto para esta intervención, o que permitirá a Augas de Galicia continuar cos traballos para completar a redacción do proxecto.