O Pino (A Coruña), 31 de xaneiro de 2023

O conselleiro do Medio Rural, José González, acompañado pola directora xeral da Axencia Galega de Desenvolvemento Rural, Inés Santé, visitou hoxe no concello coruñés do Pino o complexo rural turístico “Vila Sen Vento”, financiado a través da medida Leader. Tamén estivo presente no acto o alcalde da localidade e presidente do Grupo de Desenvolvemento Rural (GDR) Ulla Tambre Mandeo, Manuel Taboada. 

O conselleiro salientou que esta iniciativa -que contou cunha axuda de case 97.000 euros para un orzamento que superou os 305.000-, e na que destacan ata seis diferentes cabanas situadas nas árbores, cumpre claramente os requisitos establecidos na convocatoria Leader. Así, neste sentido, José González sinalou que contribúe a xerar e soster actividade económica no rural, á creación e mantemento de emprego e tamén ao aproveitamento axeitado dos recursos naturais, fomentando a concienciación e a adaptación diante do cambio climático.  

Última convocatoria

Nesta liña, o titular de Medio Rural puxo en valor a importancia do Leader para dinamizar o agro galego e lembrou que hoxe, precisamente, remata o prazo de presentación de solicitudes na última convocatoria deste programa. Son, recordou González, 15,3 millóns de euros para as anualidades de 2023 e 2024, que xestionan os 24 grupos de desenvolvemento rural (GDR) de Galicia, entre eles o de Ulla Tambre Mandeo. 

Neste mesmo contexto, o conselleiro subliñou que durante o período 2014-2020 que establece o PDR -sen contabilizar esta última convocatoria- foron aprobados ao abeiro do Leader case 1.500 proxectos, que mobilizaron preto de 170 millóns, cunha axuda pública de 71,5 millóns de euros. Estas iniciativas conseguiron consolidar 3.256 empregos e crear outros 933 novos postos de traballo. 

Ademais, resaltou González, a Xunta asinou recentemente as addendas aos convenios cos GDR galegos que permiten asegurar o financiamento necesario para estes grupos durante este ano. Así, engadiu, o equipo de 63 técnicos que traballan pegados ao territorio dentro destas entidades poderán seguir facéndoo, ao tempo que impulsan novas estratexias para o próximo período do programa Leader. De feito, indicou tamén o conselleiro, os GDR contan cunha axuda de 35.000 euros cada un para a elaboración destas estratexias, un orzamento conxunto que, polo tanto, ascende a 840.000 euros e que triplica o que tiveron en 2016 para a elaboración das estratexias actuais. 

A maiores, José González trasladou que neste ano tamén se están a executar os proxectos da última convocatoria de cooperación 2022-2023, que conta cun orzamento de 922.000 euros (case o dobre cá convocatoria anterior) e que, ademais, incrementouse o importe máximo de axuda a cada proxecto, pasando dos 100.000 ata os 150.000 euros. 

Lei de recuperación

Por último, o conselleiro valorou que os GDR xogan un papel fundamental dentro da Lei de recuperación da terra agraria de Galicia, no sentido de explicar e asesorar tanto á poboación local como aos agricultores, gandeiros ou produtores forestais sobre as posibilidades que ofrece esta norma. Opcións para recuperar terra e identificar as zonas do territorio onde se dan as características máis adecuadas para a posta en marcha de ferramentas como as aldeas modelo, os polígonos agroforestais ou as agrupacións de xestión conxunta.