A Xunta destina preto de 2 M€ en axudas para a transformación de pequenas e medianas empresas da industria forestal galega e do contract
O Diario Oficial de Galicia (DOG) publica hoxe a resolución da Axencia Galega da Industria Forestal cos 15 beneficiarios destas achegas convocadas o ano pasado, para un investimento de case 4,5 millóns de euros
Teñen como obxectivo apoiar ás actividades de valorización e segunda transformación das pequenas e medianas empresas da industria forestal galega e do contract que empreguen a madeira e os seus derivados
As actividades subvencionables son as actuacións que teñen como finalidade directa ou indirecta a transformación destes materiais en procesos ou produtos -novos ou valorizados- que reduzan o impacto medioambiental destas industrias
O Diario Oficial de Galicia (DOG) publica hoxe a resolución da Axencia Galega da Industria Forestal, dependente da Consellería do Medio Rural, na que se indican os beneficiarios destas subvencións, por un importe propio de preto de 2 millóns de euros. Estas achegas teñen como obxectivo apoiar as actividades de valorización e segunda transformación das pequenas e medianas empresas da industria forestal galega e do contract que empreguen a madeira e os seus derivados, a resina, a cortiza ou outros produtos de orixe forestal como materia prima para a elaboración dos seus produtos no mercado interior.
As actividades subvencionables son aqueles proxectos de investimento realizados polos solicitantes nos procesos de produción vinculados á transformación de produtos de orixe forestal, exceptuando os alimentarios, e que teñan como obxectivo aumentar a súa produtividade ou a implantación de técnicas que permitan obter novos produtos, produtos valorizados ou procesos que favorezan a minoración do impacto ambiental. Tamén son obxecto de subvención aqueles investimentos e gastos que garden relación directa co proxecto financiado, como compra de maquinaria ou outros bens de equipamento novos que formen parte do activo da empresa e interveñan no proceso produtivo obxecto do proxecto.
Axenda de impulso da Industria forestal-madeira
Esta actuación enmárcanse na Axenda de impulso da industria forestal-madeira, unha folla de ruta deseñada conxuntamente cos principais axentes para potenciar o sector e impulsar a bioeconomía como motor de competitividade, favorecendo unha sociedade saudable, neutra en carbono, baseada no emprego verde e no consumo de produtos locais.
Para acadar estes obxectivos, definíronse catro eixes fundamentais, relativos á mellora do capital humano a través da formación, ao impulso da innovación, á cooperación e valorización e á competitividade, desenvolvemento e diversificación do sector.
A través destes eixes e dun orzamento de 55,5 millóns de euros, a Axenda prevé mobilizar preto de 140 millóns de euros no reforzo da competitividade e da modernización dun sector clave no ámbito rural.
Imaxes relacionadas
